Vise Primeiru Ministru no Ministeriu Justisa fahe sertifikadu rai ba komunidade

Ministériu Justisa liu hosi Diresaun Nasionál Direitus Umanus no Sidadania, selebra loron mundial Direitus Umanus iha Distritu Likisa, 10 Dezembru 2011.

Atividade selebrasaun loron mundial, ho tema,” Selebra Loron Mundial Direitus Umanus 2011, Hametin Direitu Asesu ba rai no Promove Dezemvolvementu Nasionál,” Vise Primeiru Ministru, Jose Luis Guterres hanesan reprezentasaun Primeiru Ministru ne’ebé partisipa iha komemorasaun ne’e hateten “Ha’u hakarak hatutan-tan katak Direitus Umanus ohin loron bainhira ita selebra ne’ebé ita bele ko’alia ba malu nune’e mós krítika malu, hodi partisipa ba dezenvolvimentu nasaun nian.

Ita mós labele haluhan ema-toamk ne’ebé iha tempu defisil no funu fó-án ba mate atu defende liberdade, Direitus Umanus no defende demokrásia hodi ohin-loron ita hotu hamutuk iha ne’e hodi hahí loron Direitus Umanus.”

VPM ne’e hatutan tan ,”Ohin hanesan loron espesial ida ne’ebé ema timoroan tomak tenki hahí erois sira nia hakás-an, tanba liu hosi sira mak ohin loron Timór-Leste hetan liberdade no bele moris iha demokrásia no Direitus Umanus nia laran.”

iha fatin hanesan Minitra Justisa, Lucia Lobato iha abertura hateten,” iha tinan 2011 ne’e ita marka mós istória ida katak Timór-Leste hanesan mós membru Nasoens Unidas, no ita halo ona ita-nia obrigasaun hodi hato’o relatóriu Direitus Umanus nian ba dahuluk iha Jenebra ne’ebé iha fulan liu-ba delegasaun boot ida hosi Timór-Leste ba Jenebra hodi halo aprezentasaun ba direitus umanus kona ba ita nia rai. Timor-Leste iha biban ida ne’ebá, iha oportunidade hodi hato’o ba mundu tomak kona-ba situasaun direitus umanus iha Timór-Leste, buat ne’ebé mak ita halo ona no mós sei hetan servisu boot ne’ebé mak ita sei halo ba oin.”

Iha selebrasaun loron mundial ne’ebé partisipantes rihun rua resin ne’ebé nakonu iha kampu futebola Likisa ne’e Ministra Justisa hatutan tan ,”Ba oin benefisiu boot nafatin ba ita hotu hanesan Timor oan, halo nusa mak ita hotu hamutuk atu bele garante nafatin katak, direitus umanus ne’e ita hotu nian, respeita ita nia direitus umanus rasik ho mós ema seluk nia direitu, Ita hotu hamutuk sei depende direitus umanus ba ita hotu iha Timór-Leste.


Vise Primeiru Ministru no Ministeriu Justisa fahe sertifikadu rai ba komunidade
Vise Primeiru Ministru, Jose Luis Guterres ne’ebé akompaniadu ho Ministra Justisa, Lucia Lobato, fahe surat sertifikadu ba komunidade ne’ebé sai nai’in ba rai.

Selebrasaun loron mundial Direitus Umaus ne’e hanesan mós ba dahuluk atu rekoñese ka fó sertifiksaun ba titulo dahuluk nian ne’ebé Governu hakarak atu fó ba ita-nia komunidade tomak, hahuu hosi Distritu tolu mak hanesan Distritu Liquisá, Manatuto no Ainaro, tanba sira liuona hosi prosesu ne’ebé naruk. Iha biban ne’e Ministra Justisa hakarak mós hateten katak, loron ida ohin sai hanesan loron importante ida no festa ida ba povu Timor-Leste tomak atu selebra loron Dirietus Umanus hanesan mós ba dahuluk povu Timór-Leste hahuu simu sertifikadu hosi Estadu kona-ba rai ne’ebé partensia ba sira (komunidade) Red).