MINISTERIU JUSTISA, liu husi Diresaun Nasionál Rejistu Notariadu, iha Kuarta-feira, loron 4 fulan-Agostu, 2011, entrega Sertifikadu no Estatuto ba Organizasoens Artes Marsiais : Kempo, Kera Sakti, KORK no PSIDIRI.

Iha seremonia ne’ebé anima ho atrasaun husi organizasoens Artes Marsiais, Ivo Valente lori Ministra Justisa nia naran hateten, : “Ohin loron importante ba juventude Timór-Leste nian, liu-liu ba grupos artes marsiais ne’ebé maka hatudu sira nia progresu boot ida tamba rejistu nia-an voluntariamente hodi kumpri dever ne’ebé hakerek iha Lei no.5/2005 kona-ba harí asosiasaun.”

Artes Marsiais hanesan ema hotu hatene katak, ida-idak hó nia prinsipiu fundamentál nebe adopta husi sira nia membru hotu. La’ós deit iha parte desportu nian maibé parte seluk mós juventude iha dever atu kontribui ba dezenvolvimentu Estadu Timór-Leste ida ne’e.

Iha sorin seluk nia mós hateten, : “ Artes Marsiais nudár atividade desportiva ne’ebé ho tékniku oioin ajuda hadia ema nia físiku-mental.”

Artes Marsiais tuir Vise Ministru Justisa Ivo Valente, “……idaidak iha nia dalan., nune’e hodi di’ak ba sira nia mental no sira nia saúde no di’ak-liu ba kompetisaun iha rai-laran no mós iha rai-liur hodi halo morin TL nia naran.”

Iha parte seluk artes marsiais mós hanorin, normalmente, oinsá membru idaidak iha iha atitude ka hahalok ida di’ak, hanesan iha ajuda malu no respeita malu nia laran, artes marsiais mos iha sira nia knar no devér atu salvaguarda sira nia naran di’ak.

Nune’e tuir Ivo, : “……artes marsiais ejiste la’ós atu estraga malu maibé atu dezenvolve fizikamente, liu-liu, desenvolve juventude sira nudár futuru nasaun nian. “

Vice Ministru relembra mós katak “……dalaruma iha pasadu rona grupu ka individuo balu mak kria konflitus maibé ema sempre fó todan ba artes marsiais. Ne’e la’ós artes marsiais nian maibé membru ka individuo nia sala tamba sira seidauk banati tuir prinsipiu sira ne’ebé mak organizasoens artes marsis ida-idak hanorin.”

Tamba ne’e governu hamosu Lei-foun númeru 10/2008 atu regula tantu iha sentru ka iha klube artes marsiais nian rasik.

Lei ne’e tuir nia objetivu, tenik Ivo, katak : “……atu garante orden públiku, hanesan respeitu ba sidadaun sira nia direitu, liberdade no konfiansa.”

“Liu husi lansamentu ne’e ha’u husu ba Sentru Klube no Eskola Artes Marsiais nian hotu iha TL atu hola parte iha rejistu ne’ebé tuir-mai iha Diresaun Nasionál Rejistu Notariadu Ministériu Justisa nian, direjenti ba grupu artes marsiais nian mós tenki habelar informasaun ba membru sira konaba lei artes marsiais nian ne’ebé iha ona atu nune’e membru sira bele kompriende hodi tau iha pratika.”

Wainhira rejistu ona la’ós atu garante de’it estabilidade ba komunidade iha TL maibé bainhira rejistadu ona tuir baze legal, katak artes marsiais hetan ona profisionalidade jurídika, nune bele loke dalan ba artes marsiais atu hetan apoiu ruma husi Estadu ka see de’it.

Bele enkamiña legalmente ho dalan ne’ebé mak lejislasaun konaba matéria ida ne’e admite.Nune, sei la difikulta governu atu fó apoiu ruma ba artes marsiais.

Iha sorin seluk Sekretáriu Estadu Juventude Desportu, Miguel Mane Telu haoto’o ninia apresiasaun boot ba Ministériu Justisa, liu-liu Diresaun Nasioál Rejistu Notariadu ne’ebé bele atende prosesu hetan estatutu artes marsiais nian ne’e ho di’ak.

Nia hateten, : “……liu husi programa rejistu artes marsiais ne’e, iha futuru sei hamoos imajen negativu husi komunidade fó ba organizasoens artes marsiais. Tamba ne’e mak lei ne’e mosu atu regula lala’ok organizasoens artes marsiais.”

Seremonia entrega estatuto no sertifikadu ne’e hala’o simbolikamente deit husi Sr. Vise Ministru justisa, Dr. Ivo Valente, acompaña mós husi Presidenti Funsaun Públika, Sekretáriu Estadu Juventude Desportu no Reprezentante Sekretáriu Jeral Nasoens Unidas nian iha TL.

Seremonia refere mós hetan partisipasaun husi dirigentes husi organizasoens artes marciais seleuk nebe sei dauk rejistu tuir lei haruka.

Ananias Babo Horta
Media Officer