Organizasaun Naun Govermental (ONG) BELUN servisu hamutuk ho Ministériu Justisa, liu husi Diresaun Nasional ba Direitus Humanus no Cidadania (DND-HC) halao Seminariu ho tema ”Existên-sia Relijiaun no Hametin Tolerânsia iha Timor-Leste”.

ONG BELUN ho Ministériu Justisa organiza semináríu ne’e hare ba situasaun real iha Timór-Leste ikus-ikus ne’e akontese problema kona-ba relijiaun iha Distritu hotu nebe sai núdar preokupasaun ba komunidade sira.

Ho komunidade nia preokupasaun hirak ne’e maka, NGO BELUN halo koordenasaun ho DNDHC Departamentu Direitu Humanus hodi hala’o aktividade ba semináríu ida ne’e hodi bele fanu sarani tomak iha Timór-Leste inklui sarani Katolika, Protestante, Muslumanu, Seita Vizaun Kristaun no sira seluk ne’ebé oras ne’e dadaun existe iha nasaun ne’e.

Semináríu ne’e nu’udár Edukasaun ida ba sira hotu atu moris iha Harmonia, Paz no Estabilidade, hodi haforsa Estadu ba Direitu Demokrasia, Justisa no Direitu Humanus.

Iha semináríu ne’e Ministra Justisa, Lúcia Maria Brandão Freitas Lobato, ne’ebé koa’lia kona-ba Politika Governu ba Dezenvolvimentu Relijiaun Foun iha Timór-Leste ho Legalidade ne’e iha diskursu hateten,” Hau tenke tau Governu nia pozisaun iha aspektu ida ne’ebé proteze sidadaun sira nia Direitu atu labele viola sidadaun sira seluk nia direitu.

Ho ida ne’e ita presiza iha lei para regula duni aktividade sira ne’ebé fo impaktu negativu ba ita nia sosiedade rasik, tamba realidade komesa mosu konflitu ne’ebé bele estraga ita nia seguransa rasik”.

Relasaun ho preokupasaun kona-ba relijiaun foun ne’e Ministra Justisa hatutan tan,” Governu mos labele taka dalan para sidadaun ida-idak bele tuir fiar ne’ebé mak sira iha, tamba ida ne’e direitu fundamenta humanu ,”.

Mekanismu atu Regulariza Lalaok Relijiaun iha Timór-Leste bazea ba Estadu ba Direitu Demokratika artigu 45 Konstituisaun RDTL. Deputada Parlamentu Nasional, Komisaun A, Fernanda Borges hateten,” Timór oan tu’ur ha-mutuk atu hare kona-ba konflitu ne’e para labele mosu konflitu boot iha rai ne’e.

maske Estadu garante Liberdade ema hotu atu hili ninia relijiaun maibe ita seidauk define klaru atu hatur liberdade relijioza nian,”.

Iha fatin hanesan husi parte Vizaun Kristaun Pastor Junior Teres hateten,” Existensia relijiaun iha nasaun ne’e bele hametin toleransia. Kuandu kumpriende defisil ba ita atu iha toleransia ba malu, tamba toleransia ne’e importante tebes ba iha demokrasia, tamba fasil ba ita atu respeita malu ho diferensia ne’ebé mak iha,”.

Nu’udar oradór ba semináriu ne’e, Amu Matinho Gusmão representa Igreja Katolika, Pastora Maria Fatima representa Igreja Protestante, Samsul Ribeiro, Representante Comunidade Musulmana no Dinora Granadeiro representa Forum ONG Timór-Leste.

(João Maupelo da Costa)