DILI, CFJ – Kinta-Feira, loron 30 fulan-Jullu 2015, Ministru Justisa, Ivo Valente fó-posse ba kargu diresaun no xéfia hamutuk ema nain 29 iha ámbitu Ministériu Justisa ne’ebé mak kompostu hosi; Diretór Nasionál ema nain-ida, Diretór Munisípiu nain-tolu no Xéfi Departementu hamutuk ema nain 25.

Serimónia fó-posse ne’e hala’o iha Centro Formação Jurídica (CFJ) Dili ne’ebé mak akompaña hosi S.E. Ministru Estadu Koordenadór asuntu Administrasaun no Justisa, Dionisio Babo Soares, P.hD., Komisaun Funsaun Públika, Komisaria Olandina Caero no mós Sekretáriu Estadu Terras Propriedade, Jaime Xavier Lopes.

Iha serimónia fó-posse ne’e, Ministru Estadu Koordenadór, Dionisio Babo Soares hato’o ninia intervensaun katak, “tomada da posse nu’udar sikúlu ba funsionáriu públiku ida-idak ne’ebé mak hatudu ona ninia dezempeñu, sikúlu ne’e akontese atu refresh – halo fresku hikas instituisaun hodi hetan kbiit nune’e produtivu liután no presta ninia prestasaun servisu ba povu no Estado Timor-Leste.”

Ministru Justisa, Ivo Valente wainhira hato’o ninia diskursu, foufoun hato’o ninia apresiasaun ba Komisaun Funsaun Públiku (KFP) ne’ebé hálais prosesu tomada da posse, hodi nune’e funsionáriu mandatadu hosi Ministériu Justisa hala’o ona sira-nia kna’ar lalais.

Ministru Justisa informa, háfoin serimónia ne’ebé hala’o tiha iha loron 28 fulan-Abril kotuk bá, ohin, hakat ona serimónia dala ikus hodi hametin estrutura Ministériu Justisa nian. Tanba-ne’e, ita-bo’ot sira ne’ebé mak ohin simu-posse iha Repúblika Demokrátika Timor-Leste nia sasin ne’e, iha papel importante hodi alkansa meta ne’ebé hatu’ur ona iha Planu Estratéjiku Setór Justisa 2011-2030, katak, ita-bo’ot sira simu responsabilidade nakonu iha kabaas no tenke lori to’o rohan ho dedikasaun ás.

Nia realsa liután, ha’u pesoál no hanesan mós Ministru Justisa, ha’u hakarak hato’o ha’u-nia apresiasaun no parabéns ba funsionáriu públiku ne’ebé mak ohin simu-posse ona, katak; kargu ne’e temporariu ida, aban ka semana ka fulan bele lakon, tanba kargu ne’ebé imi assume depende ba ita-bo’ot sira ninia dezempeñu no prestasaun servisu ba Estadu no povu, ita-bo’ot sira nia superiór no povu mak sei avalia imi, bazeia ba avaliasaun mak hanesan polítiku, ami bele deside ita-bo’ot sira kontinua ka la’e.

Avaliasaun aliénde hosi imi-nia superiór sira, maibe, avaliasaun sei mai mós hosi ita-nia komunidade, avaliasaun povu mak mak importante liu, tanba povu laiha interese, imparsiál nune’e kuandu povu la-satisfaz ho ita-bo’ot sira-nia servisu, ha’u sei rekomenda ba Komisaun Funsaun públiku atu foti medida ba kargu ne’ebé ita-bo’ot sira assume dadaun; hateten Ministru Justisa depois de fó-posse ba kargu xéfia Ministériu Justisa.

“Iha oportunidade importante ida ne’e, ha’u hakarak felisita ita-bo’ot sira-nia familia mak durante ne’e fó apoiu, agradese tanba sira-nia apoiu direta no indireta hatudu ona ho promusaun kareirra ne’ebé imi simu no assume dadaun, ita-bo’ot sira hala’o kna’ar di’ak tebes, parabéns; hateten Ministru Justisa wainhira hakotu ninia diskursu.

Iha serimónia ne’e, Ministru Justisa entrega mós Sertifikadu Apresiasaun ba funsionáriu Públiku ne’ebé mak hetan ona reforma – pensionista, nune’e mós ba iha sobrevivénsia sira – ba familia funsionáriu sira ne’ebé mak mate, ba sira-hotu mak kontribui ona ba Estadu, liuliu Ministériu Justisa iha tempu barak nia laran ho sira-nia responsabilidade, prestasaun no dedikasaun.

Serimónia tomada da posse partisipa hosi familia mandatadu sira, pensionista, sobrevivénsia, Provedór Direitus Umanus no Justisa Silveiro Baptista Pinto, Inspetór Jerál Estadu Francisco de Carvalho, Diretór Jerál Ministériu Justisa Henrique de Oliveira Ximenes, Diretóra Jerál CFJ Marcelina Tilman, Inspetór Jerál Ministériu Justisa Lucas Antonio da Costa, Sub-Inspetór sira, Xéfi Gabinete Ministru Justisa Evangelino Belo, Xéfi Gabinete Sekretáriu Estadu Terras Propriedade Marciano Barreto, Direitór sira, Xéfi Departementu sira no mós funsionáriu sira iha ámbitu Ministériu Justisa.