Dili,, Ekipa ida husi Direcção Naçional de Assessor Jurídica e Legislação (DNAJL) Ministériu da Justisa (MJ), ne’ebe lidera husi Direitor Nelinho Vital, iha loron segunda-feira, 6 julho 2015, halo diskusaun ho ho presidente Komisaun Funsaun Publiku (CFP) Sr. Faustino Cardoso nomos Sra. Komisaria Olandina Cáero konaba proposta rejime karreira espesial ba tradutor no intérprete jurídiku.

Diskusaun ida ne’e, hala’o atu kumpi regra husi Conselho Ministros nian konaba prosesu lejislativa ba proposta karreira funsionariu nian. Aleinde ne’e, diskusaun ida ne’e atu hetan liu tan idea konaba proposta lei refere.

Iha diskusaun horas ida resin nia laran ne’e, konsege halo diskusaun ida klean hodi diskuti konaba razaun fundamentu tamba sa mak kria tan rejime karreira espesial ida ne’e.

Hatan ba kestaun hirak ne’e, ekipa DNAJL argumenta katak, razaun fundamentu atu aprezenta proposta lei ida ne’e tamba atu hatan ba politika estado nian konaba timorizasaun iha setor justisa nomos atu implementa politika konaba asesu ba justisa. Hanesan ita hotu hatene katak, povu timor, barak liu maka la iha konhesimentu diak lian Portuges.

Ho nune’e, difikulta ita nia povu atu iha konhesimentu diak ba lei sira, inklui atu fasilita ita nia povu sira nia kumpriensaun, wainhira sira ba hatan iha Tribunal nian oin.

Husi diskusaun ida ne’e, hamosu tan rekomendasaun foun ba ekipa DNAJL atu haforsa liu tan fundamentu ba aprezenta lei ne’e, bazea ba artigo 28 husi Decreto lei 20/2011, loron 8 de junho.

(Mize Correia/DNAJL)