DILI - Ministru Justisa, Ivo Valente halo serimonia asinatura akordu kontratu ba arendamentu Bens Imóves ba Domíniu Privadu Estadu ho ezekusaun akordu espesiál ba investimentu ne’ebe selebra entre Repúblika Demokrátika Timór-Leste liu husi Ministériu Justisa ho Kompañia Heineken Timor, iha salaun Sentru Formasaun Jurídika (CFJ) Caicoli Dili, iha loron 29 fulan Juñu tinan 2015.

Serimonia ne’e halao bazeia ba aprovasaun rezolusaun Governu Nú. 37/2014 loron 17 fulan Dezembru. Ho nune’e Ministru Justisa hodi realiza asinatura akordu kontratu ne’e.

Iha diskursu Ministru Justisa, Ivo Valente hateten, ”kontratu arendamentu ne’ebé halao ho Kompanñia Heineken Timór ezekuta ona akordu espesiál Investimentu ne’ebe estabelese ba entidade hanesan iha Janeiru tinan oin, hetan autorizasaun husi Konsellu Ministru (KM) iha fulan Novembru tinan kotuk, justifika kona-ba kustu insentivu espesiál ba impaktu ekonómia sosiál no téknolojia ne’ebe haketak husi projeitu ne’e imvolve investimentu ida ho montante arendamentu 40.000 (rihun hat nulu) dolar amerikanu. Hein katak sei hari iha tinan rua nia laran no tuir mai simu ema servisu nain sira hamutuk ema nain 200 (atus rua) no ema nain 800 funsiona tuir presiza.”

Serimónia ne’ebe akompañia mós Sekretaria Estadu Terras Propriedade (SETP), Jaime Xavier Lopes no Sekretaria Estadu para o Apoio e Promoção Sosio-Económica da Mulleres (SEM), Veneranda Lemos Martins; no Ministru Justisa realsa liu tan, ”atu hari’i nasaun ida tenke hamosu servisu ka emprega no rendamentu ba povu Timór-Leste, presiza mós dada investimentu ba setór sira industria no estabelese mós parseria no empreza sira internasionál ba konstrusaun infra-estrutura hodi apoiu empreza lokál sira hodi hasae no hamoris kresimentu ekonómiku.”

João Maupelo da Costa
Ofisiál Relasaun Públika
Ministériu Justisa