DILI, – Kinta-Feira, loron 18 fulan-Juñu 2015, Ministru Justisa, Ivo Valente hala’o konferénsia imprenssa hodi informa ba públiku kona-ba Konferénsia Nivél Ministru Justisa Paíz Sira Lingua Ofisiál Portuguesa ba dala XIV, konferénsia ne’e sei realiza iha semana oin, loron 22 – 23 fulan-Juñu 2015 iha Salaun Konferénsia Ministériu Negósiu Estranjeiru no Kooperasaun (MNEK) Dili, Timor-Leste.

Press Conference (konferénsia imprenssa) ne’e akompañadu husi Diretór Jerál Ministériu Justisa no Ministru Justisa hateten, ”konferénsia ne’e, nasaun Repúblika Demokrátika Timor-Leste sai nu’udar uma nain,

ho ida ne’e hanesan pasu istóriku ida ba nasaun Timor-Leste nu’udar parte komunidade Lingua Ofisiál Portugues nian, Timor-Leste partisipa iha reuniaun altu nivel nian alargadu hahú husi 2003 iha Brasil no kontinua halo parte ativu iha nasaun CPLP nia iha domíniu justisa. Konferénsia ba dala XIV iha Timor-Leste, ita Timor-Leste iha parte Ministru Justisa ba nasaun Lingua Portuguesa hanesan mós konferensia internasionál ne’ebé halao dala ida kada tinan rua. Objetivu prinsipál husi konferénsia ne’e mak oinsa pomove no dezenvolve nasaun sira ne’ebé mak hola parte hanesan nasaun sira ho lingua Ofisiál Portugues nian.”

Iha konferénsia ba dala XIV iha Timor-Leste ne’e, Ministru Justisa Ivo Valente akresenta liu tan, ” Timor-Lete hili tema prinsipál ba XIV mak hanesan: “Propriedade rai nu’udar fatór dezenvolvimentu”, tema ida ne’e importante ba paises CPLP atu dezenvolve komunidade iha ámbitu paises ho lingua ofisiál Portuguesa nian. Durante konferénsia sei rona ka aprezenta rezultadu servisu husi komisaun servisu nian hosi konferénsia ne’ebé hala’o uluk ona iha Mauputo, iha rezultadu rua mak hanesan; dahuluk kona-ba Tráfiku Umanu no daruak kona-ba corrupção e transações internacionais.

Iha fatin hanesan, Diretora Jerál Sentru Formasaun Jurídiku, Marcelina Tilman ne’ebé assume kargu hanesan Prezidente Komisaun Organizadora ba Konferénsia ne’e hateten, iha konferénsia ne’e sei partisipa husi Ministru Justisa Lingua ofisiál Portuguesa nai’in hat hanesan; Cabo-Verde, Guiné-Bissau, Moçambique no São Tomé é Principe no Portugal (Sekretáriu Estadu), Brazil (Representação) no Angola (Diretór Jerál).

Hafoin press conference nia rohan Ministru Justisa hatutan katak, “konferénsia remata entre Ministru Justisa nasaun sira ho lingua ofisiál Portugues sei asina deklarasaun hamutuk ida kona-ba protesaun internasionál ba labarik iha espasu paises CPLP nian no ha’u apela ba komunidade Timor-Leste tomak, liu-liu komunidade ne’ebé hela iha Dili atu fo apoiu ba konferénsia Ministru Justisa nasaun sira ho lingua ofisiál Portuguesa ne’e atu la’o ho susesu.”

Bainaka sira husi nasaun lingua ofisiál Portuguesa ne’ebé nu’udar korespondente nasionál sei to’o iha Dili, ohin, loron 18 fulan-Juñu no bainaka VIP sira sei to’o iha Dili iha loron 20-21 fulan-Juñu tinan 2015.

João Maupelo da Costa
Ofisiál Relasaun Públika
Ministériu Justisa