Dili, Iha loron segunda-feira, 15 juño 2015, Direcção Naçional de Assessor Jurídica e Legislação (DNAJL) Ministériu da Justisa (MJ) halo diskusaun ba esbosu Lei Justiça Juvenile hamutuk ho grupu tekniku ne’ebe mai husi Tribunal, Procuradoria, Defensoria Publiku, Ministeriu Sosial no Soliedadriedade, Ministeriu Justisa husi Diresaun Servisu Prizaun nian, Komisaun Nasional Direitu Labarik, ONG Nasional ALFELA no UNICEF.

Grupu tekniku ida ne’e, forma iha tinan 2014, ho objetivu prinsipal atu halo revizaun no analiza ba esbosu lei justisa juvenile ne’ebe MJ prepara. Grupu tekniku ida ne’e, halo sorumutu ba dala 3 ona, hahu iha Dezembru 2014.

Ba sorumutu ida ne’e, ekipa lejislador husi DNJAL, ne’ebe lidera husi Sr. Nelinho Vital, aprezenta ba grupu tekniku konaba progresu husi esbosu lei justisa juvenile, hafoin sorumutu grupu nian iha Maubara no Dare, inklui diskusaun tekniku ne’ebe hala’o ho ekipa lejislador husi International Cooperation Department (ICD) Ministériu Justisa (MJ) Japaun.

Ba esbosu lei ne’e rasik, tuir esplikasaun husi Sr. Vital katak, “proposta lei justisa juvenile ne’e iha mudansa uituan, bazeia ba rezultadu diskusaun grupu nian iha Maubara no Dare inklui mos diskusaun ho grupu ida husi MJ Japão nian. Ho nune’e, ohin DNAJL mai aprezenta fali versaun foun tamba iha mudansa ba artigu balun tamba atu la bele iha repetisaun nomos leitura redasaun nian ne’ebe simplifika ona atu nune’e fasil ba ema nia kumpriensaun”.

Diskusaun loron ida nia laran ne’e, konsege hamosu diskusaun ida klean no porfunda ba artigu sira ne’ebe DNAJL aprezenta.

Hanesan mudansa ba palavra ne’ebe hakerek iha esbosu lei ne’e nian laran, maske fasil atu kumpriende maibe dalaruma la tuir fali termu juridiku nian ou diskusaun ba iha artigu balun ne’ebe atu “konsidera” hanesan kontra ho prinsipiu sira ne’ebe hakerek iha konvensaun internasional direitu labarik nian.

(Mize Correia/DNAJL)