ATAURO, DILI – Segunda-Feira, Loron 08 fulan-Juñu 2015, Ministru Justisa Ivo Valente halo vizita ba Postu Administrativu Atauro Munisípiu Dili hodi ensera lansamentu ba levantamentu Sistema Nacional Cadastral (SNC) ne’ebé mak hala’o tiha ona iha munisípiu sanulu resin-tolu iha territóriu Timor-Leste tomak.

Prezensa Ministru Justisa nian iha Ilha Atauro, Munisípiu Dili, aliende atu rona besik populasaun Ilha Atauro nia hanoin kona-ba kestaun rai iha fatin refere no fó orgullu mós ba sidadaun Atauro tomak kona-ba sistema levantamentu nasionál kadastrál ne’ebé mak Governu hala’o dadaun.

Ministru Justisa Ivo Valente hateten, levantamentu kadastru nu’udar polítika kontinuasaun hosi programa V Governu Konstitusionál nian atu hametin sidadaun sira-nia direitu nain ba rai, no atu hádalan mós oportunidade ba investimentu iha rai laran; tanba rai sai nu’udar instrumentu ida ba kriasaun kampu traballu, rai mós nu’udar aliserse ekonomia ba dezenvolvimentu ita-nia povu no rai sai mós fonte importante ba rendimentu estadu nian.

Tanba-ne’e, iha oportunidade ida ne’e, ha’u hakarak informa mós ba ita-bo’ot sira hotu, programa levantamentu kadastru ne’e nia objetivu mak atu identifika rai hotu-hotu iha territóriu Timor-Leste laran tomak; hodi buka tuir sé mak nu’udar nain ba rai, hodi emite rejistu rai nian (laós sertifikadu rai).

Atu sai nain ba rai no hetan sertifikadu nain ba rai, ita sei hein lei rai nian wainhira aprova ona iha Parlamentu Nasionál, hodi nune’e bele atribui rai ba sidadaun hotu-hotu tuir mandatu artigu 54 Konstituisaun RDTL; hateten Ministru Justisa Ivo Valente wainhira hato’o ninia diskursu iha serimónia enseramentu ba levantamentu kadastru iha Ilha Atauro.

Iha okaziaun ne’e, Ministru Justisa Ivo Valente mós fó-nia agradesimentu ba povu Atauro ne’ebé fó biban hodi partisipa iha serimónia lansamentu kadastru ne’e, nia husu ba partisipante sira-hotu atu lori mensajem ne’e ba maun-alin sira ne’ebé mak la-konsege atu partisipa iha eventu ida ne’e.

Iha prosesu serimónia lansamentu SNC, atravez-de aprezentasaun ne’ebé hala’o hosi Ministru Justisa, Sekretáriu Estadu TP no Tékniku SNC; loke mós oportunidade ba partisipante sira hodi husu no hatán.

Antes atu termina seremónia enseramentu Lansamentu SNC iha Atauro Munisípiu Dili, Administradór Gaspar Soares hateten, ohin ita hotu-hotu iha fatin ida ne’e hodi rona no sai sasin ba Levantamentu Kadastrál, hau husu atu ita hotu-hotu nia kolaborasaun masimu hosi povu Atauro “oinsá” fó informasaun loloos ba ekipa SNC ne’ebé mak sei mai iha ita-bo’ot sira-nia fatin ida-idak.

Serimónia Lansamentu SNC iha Munisípiu Dili, Postu Administrativu Atauro hetan partisipasaun masimu hosi populasaun hosi Suku hamutuk lima (5) no direjente lokál sira, no akompaña Ministru Justisa Ivo Valente mak; Sekretáriu Estadu Terras Propriedades Jaime Xavier Lopes, Diretór GMN no Presidente CNT Jorge Serano, Tékniku SNC hosi Portugal, Administradór Munisípiu Dili Gaspar Soares, Administradór Postu Atauro Manecas da Costa Soares no Xéfi Gabinete Ministru Justisa Evangelino Belo.