Dili – Ministru Justisa Ivo Valente halo aprezentasaun ba Estatutu Orgánika Ministériu Justisa nian iha reuniaun Konsellu Ministru. Proposta lei ne’e, passa ona no hetan aprovasaun hosi Konsellu Ministru iha Tersa-Feira, loron 26 fulan-Maiu 2015.

Diploma ida ne’e importante tebes, tanba sai hanesan baze fundamentál ba Ministériu Justisa atu ezerse nia funsaun hodi fó prestasaun servisu ba komunidade, tuir kna’ar ne’ebé hatu’ur ona Lei Orgánika VI Governu Konstitusionál.

Ministru Justisa Ivo Valente informa katak, Estatuto Orgánika Ministériu Justisa hetan mudansa no ajustamentu balun relasiona ho mudansa estrutura Governu nian. Proposta ne’ebé aprova konklui mós Polísia Sientífika Investigasaun Kriminál (PCIC) ne’ebé foti parte integradu iha Ministériu Justisa no mós muda Komisaun Nasionál Direitu Labarik hosi Ministériu Justisa ba iha Ministru Koordenadór ba Asuntu Sosiál nian. Seluk tán, laiha mudansa, estrutura servisu sentrál no mós órganismu tutela sira seluk, sei mantein nafatin.

Maske nune’e, diploma refere fó dalan atu Ministériu Justisa bele habelar tán nia-liras iha munisípiu sira tuir polítika deskonsentrasaun administrativa nian.

Iha reuniaun aprezentasaun Estatutu Orgánika Ministériu Justisa iha Konsellu Ministru, Ministru Justisa Ivo Valente akompaña hosi Diretór Nasionál Assessoria Jurídica e Legislação (DNAJL) Nelinho Vital, no mós jurista balun tán.