SAME-Sekretáriu Estadu Terras Propriedades (SETP) Jaime Xavier Lopes hmutuk ho Ministru Justisa, Ivo Jorge Valente iha loron 19 fulan-Maiu 2015 foin lalais ne’e hala’o lansamentu levantamentu dadus kadastrais tuir Sistema Nasional Cadastro (SNC) bad ala ikus nian iha munisipiu Manu fahi.

Iha lansamentu sistema nasional kadastro ne’ebé simbolikamente ho entrega tablet ba iha ekipa tékniku sira ne’e hala’o iha salaun enkontru Terras Propriedades nian no hetan partisipasaun masimu hosi entidade sira hotu ne’ebé maka hamahan aan iha munisipiu manufahi inklui mós Administradór Munisipiu, Komandante PNTL, lideransa komunitária no komunidade sira.

Antes entrega tablet ba iha ekipa tékniku sira SETP husu ba ekipa tékniku SNC nian sira tenki hala’o servisu tuir sira nia knar lolos, nune’e bele tau intrese ema hotu nian ás liu intrese privadu.

Tanba ne’e nia husu ba ekipa sira, bainhira atu ba halo levantamentu dadus ba iha komunidade sira nia rai tenki fó uluk informasaun ba iha komunidade sira hodi labele mosu dezentendementu ruma iha loron ikus.

Jamie mós husu ba komunidade sira atu tau estaka iha sira nia kantu baliza nian sira hodi bele fasilita ekipa sira ne’ebé maka atu ba sukat rai, nia mós husu ba komunidade sira atu hato’o keisa ba iha Terras Propriedade Munisipiu Same nian bainhira ekipa sira halo kobransa ruma iha tempu halo levantamentu dadus, tanba programa sukat rai ne’ebé maka establese hosi SNC ne’e gratuita.

Iha biban ne’e Ministru Justisa Ivo Jorge Valente liuhosi ninia intervensaun hateten, bainhira ekipa tékniku sira tuun ba sukat komunidade sira nia rai, tenki fó informasaun ne’ebé loloos bainhira iha dokumentus rai nian ruma tenki relata hotu ba iha ekipa sira hodi bele transfere dadus sira ne’e ba iha sentral SNC nian ne’ebé maka sentraliza iha Dili.

Ministru ne’e husu mós ba iha komunidade sira tenke matenek hodi utiliza sira nia rai, nune’e bainhiraa tu fa’an ka foti kréditu ruma tenki hanoin didi’ak, maibé nia fiar katak, komunidade sira iha munisipiu Manufahi maioria seidauk iha sertifikadu na’in ba rai, tanba ne’e nia husu ba komunidade sira atu bele fó sira nia apoiu ba iha programa ne’ebé maka sei hala’o iha Same.

Hanesan tékniku Prezidente SNC Jorge Manuel Serano, husu ba komunidade sira liu-liu ba iha lideransa komunitária sira hodi bele haree didi’ak sasin sira ne’ebé maka atu sai sasin ba rai ne’ebé maka ekipa sira atu sukat labele ema ne’ebé hodi idade ki’ik maibé tenki ema ne’ebé maka koinese didi’ak problema rai iha suku laran.

Nia hateten, hala’o lansamentu ba iha levantamentu dadus kadastrais nian ne’e hatudu katak, responsablidade ema hotu nian, liliu ba sira neebe maka sai hanesan servidor estadu nian maske iha nivel nasional eh mós iha munisipiu sira hotu-hotu tenki iha ninia responsablidade ba iha atividade ne’e liu-liu ida ne’ebé liga liu ho pronblema rai.*/

Ananias Babo Horta
Media Officer SETP