Pontu Fokál Pré-Deskonsentrasaun Administrativa (PDA) Minitériu Justisa partisipa Konferénsia Internasionál kona-ba Desentralizasaun Administrativu no Puder Lokál iha Ótel Timór iha loron 18 fulan Maiu tinan 2015.

Abertura Primeiru Ministru (PM), Rui Maria de Araújo iha konferénsia Internasionál ho tema Desentralizasaun Administrativu no Puder Lokál ne’e hateten”governu Timor-Leste ohin loron kontinua kapasita ninia a’an hodi prepara rekursu umanu ne’ebe sufisiente atu bele koloka funsiunariu públika ba servisu iha munisipiu sira ne’ebe sei implementa politika desentralizasaun hanesan parte reforma importante ida iha programa governu atu lori servisu besik liu tan ba povu tomak.”

Vise Ministru Administrasaun Estatál (MAE), Tomas Cabral iha konferénsia ne’ e hateten,” objetivu atu atinji Polítika Desentralizasaun Administrativu iha oin hát mak hanesan; Dezenvolve Setór Privadu iha Área Rurais, Promove Instituisaun Estadu ida Forte Lejitimu no Estável iha Teritóriu tomak, Kria Oportunidade foun iha Partisipasaun Demokrátika, Asegura Prestasaun ida Efetivu, Efisíente no Ekitativa iha Servisu Públiku ba Sidadaun sira,”

Kordenador PDA Ministeriu Justisa, Antonio Verdial iha sesaun husu no hatan, Verdial husu ba oradór husi Victoria-Australia no Portugal ne’ebe trata asuntu Infraestrutura, Agua, Terras no Propriedade atu ajuda Timor-Leste liu husi Sekretaria Estadu Terras Propriedade kona-ba kadastra divizaun delimitasaun teritoria administrativu Munisípiu ida ho Munisípiu seluk atu nune’e iha futuru labele hamosu disputa sira kona-ba rai no soin metin iha sosiedade nian let.”

Konferénsia ne’ebe benvindu husi Ministru Kordenadór Asuntu Administrasaun Estadu no Justisa no Ministru Administrasaun Estatál, Dionísio Babo Soares ne’ e partisipa husi Administradór Munisipiu 12 no membru GTP no GTTIM.

Oradór ba konferénsia ne’ e husi Victoria-Australia, koa’lia kona-ba (Infraestrutura, Água, Terras no Propriedade), Portugál koa’lia kona-ba (kontribuisaun Munisípiu Portugués ba Desentralizasaun iha Timór-Leste) no Indonezia koa’lia kona-ba (governu eletrónika).

Iha apresentasaun husi Governu Lokál Victoria-Australia hateten halo ona enkontru ho munisípiu nen (6) iha Timór-Leste no iha komitmentu atu fó apoiu ba area balun.