SAME, MANUFAHI – Tersa-Feira, loron 19 fulan-Maiu 2015, Ministru Justisa Ivo Valente hala’o Serimónia ikus ba Lansamentu Levantamentu kadastral Sistematiku (foti dadus kona-ba rai) iha Same, Munísipiu Manufahi.

Ministru Justisa Ivo Valente hateten, ha’u-nia prezensa iha Munisípiu Manufahi, aliende atu kompleta lansamentu levantamentu kadastral ba munisípiu 13, hare’e mós posibilidade funsionamentu ba Eis Prizaun Portuges Weberec ba Unidade Produktiva Agrikula no aban, loron 20 Maiu atu sai Inspetór ba Serimónia Isar Bandera hodi Komemora Loron Restaurasaun Indepéndensia ba dala XIII ho Povu Manufahi tomak.

Lansamentu ba Levantamentu kadastral importante tebes ba Timor-Leste nu’udar Estadu tanba koa’lia Estadu ita koa’lia kona-ba interese povu nian, tanba-ne’e, hahu ohin ba oin, Sistema Nacional de Cadastro (SNC) liu hosi Sekretáriu Terras Propriedade sei kolekta dadus kona-ba rai hotu-hotu iha Munisípiu Manufahi, SNC mak sei halo mapeamentu ba rai, fotográfia, identifika sé los mak nain ba rai no atu defini baliza rai ida-idak nian, hodi nune’e bele atribui ona sertifikadu direitu sidadaun hotu-hotu nian asesu ba rai; esplika Ministru Justisa kona-ba importansia SNC no esatuta rai ba povu.

Ministru Justisa Ivo Valente apela, “ho oportunidade ida ne’e, ha’u husu ba autoridade lokál sira no Manufahi-oan sira atu kolabora ho honestu no konsiénsia wainhira tékniku SNC to’o iha ita-bo’ot sira nia fatin, ita-bo’ot sira tenke fó informasaun ne’ebé lo’os hodi nune’e labele mosu problema iha loron ikus. Labele fa’an rai, maske bele fa’an tanba ida-idak nia direitu maibé tenke hanoin didi’ak lai antes atu fa’an.”

Iha ninia intervensaun ikus, Ministru Justisa enkoraja partisipante sira, problema bo’ot ida iha ita-nia rai mak disputa rai no baliza rai, ne’e halo família barak hare’e malu ladi’ak. Tanba-ne’e, ha’u husu ba imi-hotu, timor-oan sira tenke simu malu, Manufahi-oan tenke simu malu iha dame ho dalan dialogu atu rezolve problema oioin; dalan tribunál laós dalan di’ak, liu hosi tribunál ida tenke lakon no ida fali sei manan, ho tribunál ida sei tanis no ida fali sei hamnasa, ne’e implika ba ita-nia relasaun iha futuru.

“Ha’u hakarak imi rezolve kazu rai ho dialogu, kultura abertu, iha ámbiente dame, manufahi-oan tenke simu malu ho honestu, katak, tribunál tenke sai rekursu ikus ba rezolusaun problema.”

Serimónia lansamentu Levantamentu Kadastral iha Munisípiu Manufahi hetan partisipasaun masimu hosi autoridade lokál sira, no akompaña Ministru Justisa Ivo Valente mak; Sekretáriu Estadu Terras Propriedades Jaime Xavier Lopes, Diretór GMN no Presidente CNT Jorge Serano, tékniku SNC hosi Portugal, Adjuntu Administradór Munisípiu Manufahi Arão Isac Sarmento no mós Diretór Nasionál sira no Diretór nivél Munisípiu sira.