WEBERAK, MANUFAHI - Segunda-Feira 18 fulan-Maiu 2015, tuku 05:21 lokoraik, Ministru Justisa Ivo Valente halao vizita serbisu iha Eis Prizaun Portugues iha Weberec Munisípiu Manufahi. Prizaun antigu (Prizaun Weberec) ne’e lokalizadu iha Suku Dotic, Postu Administrativu Alas ho distánsia hosi Same Villa liu 50 km.

Prizaun Produtiva Agrikula nu’udar prizaun antigu ida tanba hari’i hosi administrasaun Portugues nian ho uma prizaun nia luan tomak 406 metru kuadradu ne’ebé lokalizada iha rai ho luan tomak 106 hektáre.

Xéfi Suku Dotic Sebastião da Costa Amaral hato’o nian apresiasaun no lori povu Dotic nian naran ba Ministru Justisa katak, Governu sei bele karik halo lalais konstrusaun ba prizaun antigu ne’e, tanba prizaun ne’e abandona kleur tebes ona.

Ministru Justisa Ivo Valente informa, VI Governu Konstitusional liu hosi Ministériu Justisa sei halo uluk planu levantamentu tékniku ba Eis Prizaun Portugúes Weberec, iha futuru bele funsiona nu’udar prizaun foun ida ne’ebé ho karáter Unidade Produtiva Agrikula nian, ne’e signifika, Prizaun Weberec bele sai sentru produsaun agrikula nian, prizioneiru sira mak sei servisu, sira sei produktivu liután hodi nune’e bele fó reseitas ba sira-nia án rasik no estadu. Maske nune’e, presiza halo koordenasaun integradu liña-Ministériu mak hanesan; Ministériu Justisa ho Ministériu Agrikultura no Ministériu Obras Públiku.

Relasaun ho VI Governu Konstitusionál ne’ebé hela tinan-rua de’it, no presiza tempu nato’on ba realizasaun, Ministru Justisa hateten, ami hanoin maske durasaun governasaun ne’e hela tinan-rua de’it ona, dalaruma tempu la-sufisiénte ona para ami atu kúmpri saída mak ami planeia ona. Maibé, ami-nia objetivu mak ne’e; ami sei halo lai levantamentu tékniku konkretu ba prizaun ne’e, halo estudu viabilidade, sukat ninia sustentabilidade no hare’e ninia benefísiu ba estadu ne’e saída. Signifika katak, importante mak Governu ne’e hahu ona, hatu’ur ona baze-estudu no tékniku no wainhira Governu seluk ida sa’e, ha’u hanoin sira bele kontinua planu ne’e.

Objetivu vizita Ministru Justisa mak atu hare’e besik situasaun Prizaun Weberec, depois sei halo planu ba levantamentu tékniku, estudu-baze no planu ne’e sei lori ba iha Konsellu Ministru hodi diskute no aprova.

Ministru Justisa Ivo Valente hala’o vizita ne’e akompaña hosi Diretór Prizaun Helder Belo, Diretór DNTP Romão Guterres, Diretora Dirasaun Terras Propriedades Munisípiu Manufahi Rosa da Costa, Diretór Dirasaun Registu Notariadu Munisípiu Manufahi Jose Reis.