ERMERA – Sexta-Feira, loron 15 fulan-Maiu 2015, Ministru Justisa Ivo Valente hala’o lansamentu ofisiál emissaun ba Bilhete Identidade (BI) iha Munisípiu Ermera.

Lansamentu emissaun BI iha Munisípiu Ermera nu’udar passu importante ida tán hosi implementasaun planu setór justisa nian hodi lori besik liután atendimentu públiku nian ba komunidade sira iha nivél munisípiu, postu administrativu, suku no mós area rurais.

Iha lansamentu emissaun BI ne’e, Ministru Justisa fó-nia agradesimentu bo’ot ba Luta-Nain sira.

“Ha’u hato’o ha’u-nia agradesimentu bo’ot tebes ba ita-nia veteranu no herói sira, ho sira-nia sakrifísiu, ohin loron ita bele iha rasik Bilhete Identidade, ne’e manifesta nasaun independénte ida, ho sira-nia esforsu ita hamri’ik hodi hi’it ulun ho orgullu, dadaun ne’e, ita komesa kompleta ita-nia instrumentu sira nu’udar Timor-oan iha Nasaun Timor-Leste, signifika BI ba timor-oan, só sidadaun Timor-Leste mak bele nain ba Bilhete Identidade.”

Ministru Justisa Ivo Valente hatutan, lansamentu BI iha Munisípiu Ermera marka mós istória foun tanba ohin, loron 15 fulan-Maiu nu’udar Loron Internasionál Familia nian, aliende ita atu lansa BI, ita mós festeza loron familía nian, loron ne’e komemora iha mundo tomak, tanba familia mak hun hosi nasaun/ estadu ne’ebé de’it, familia mak sentru, nasaun ida ba oin depende mós ba familia ida-idak, ha’u tenke dehan familia forte nasaun mós forte. Ohin, iha ne’e, Ermera-oan sira, familia tomak iha ne’e, ita-hotu festeza lansamentu emissaun BI, ho BI mak atu identifika timor-oan, Ermera-oan, mai hosi ne’ebé, hosi suku ne’ebé no hela iha ne’ebé lo’os no sel-seluk tán.

Fó hatene mós ba sidadaun hotu-hotu, tantu labarik ne’ebé to’o ona tinan 12 ba leten tenke iha ona BI, atu nune’e bele identifika nia nu’udar timor-oan duni ka la’e, hosi munisípiu ida ne’ebé, hosi suku ne’ebé no hela iha ne’ebé lo’os no parténsia ba familia ida ne’ebé lo’os. Wainhira hetan ona BI ida ne’e tenke verifika fali naran, moris fatin no data moris hanesan ka la’e, sei la hanesan hateten lalais nune’e hadia kedan.

BI importante tebes, aliende justifika ita nu’udar timor-oan, sei uza hodi rejista komérsiu ruma, atu ba trata passaporte, sei uza hodi rejista ba nain ba direitu propriedade ruma, por ezemplu hodi rejista ita-nia direitu ba rai. Tanba-ne’e, ha’u husu ba Xéfi Postu sira no Xéfi Suku sira atu transmite informasaun ne’e, fó hatene ba ita-nia komunidade sira atu hakat mai dadaun ona iha fatin ne’e hodi trata sira-nia Bilhete Identidade, tanba trata ita-nia BI bele halo ona iha Munisípiu Ermera, apela Ministru Justisa Ivo Valente.

Diretora Dirasaun Nasionál Rejistu Notariadu (DNRN) Maria Fatima de Araujo, hato’o nia intervensaun kona-ba kriteriu ka dokumentu ne’ebé tenke kompleta hodi prosesa Bilhete Identidade mak hanesan; deklarasaun hosi Suku ka Aldeia hodi hatene komunidade sira-nia hela fatin no Sertidaun RDTL, Kartaun Eleitorál ba sira ne’ebé ho tinan 17 ba leten no ba sira ne’ebé tinan 12 la persiza Kartaun Eleitoral hodi hetan BI.

Ikus liu, Ministru Justisa Ivo Valente entrega Bilhete Identidade (BI), ba ema nain-sanulu (10) iha Munisípiu Ermera mak hanesan, Veteranu Ernesto Fernandes alias Dudu, Veteranu Florentino de Jesus Martins, Veteranu Cerilo da Silva, Padre Deonildo Andrade, Komanante F-FDTL Luis Alves, Administradór Munisípiu Ermera Vitor dos Santos no sel-seluk tan.

Programa lansamentu Bilhete Identidade (BI) iha Munisípiu Ermera akompaña Ministru Justisa Ivo Valente mak; Defensór Públiku Jeral (DP), Dr. Sergio Hornai, Diretór Jeral Ministériu Justisa Dr. Hendrique de Oliveira, Inspetór-Jeral Auditória Ministériu Justisa Dr. Lucas da Costa, Xéfi Gabinete Ministru Justisa Dr. Evangelino Belo, Diretora DNRN Dra. Maria Fatima de Araújo, Diretór DNPRS Dr. Helder Belo, Xéfi Departementu IT, Xéfi Departementu Lojistíku, no hetan partisipasaun masimu hosi veteranu sira no dirijente lokal Munisípiu Ermera.