Ministériu Justisa liu hosi Diresaun Nasionál Direitus Umanus no Sidadania (DNDHC) realiza programa peskiza ba Programa divulgasaun ne’ebé Ministériu Justisa halo ona iha tinan kotuk iha munisipiu hitu (7) hanesan Ainaro iha postu administrativu Hato Builico, Bobonaro iha postu administrativu Atabae, Ermera iha postu administrativu Atsabe, Covalima iha postu administrativu Suai, Lautem iha postu administrativu Lospalos, Manufahi iha postu administrativu Same no Viqueque iha postu administrativu Lacluta.

Peskiza ne’e hodi rekolla presepsaun membru komunidade sira ne’ebé partisipa ona iha divulgasaun informasaun kona-ba leis ne’ebé Ministériu Justisa halo ona iha tinan kotuk.

Nune’e mós peskiza ne’e halo hodi hatene komunidade sira nia kuñesimentu kona-ba lei sira ne’ebé vigora iha Timor-Leste, maske ema sira ne’ebé nunka tuir ka partisipa iha programa divulgasaun ne’ebé Ministériu Justisa halo, maibe ema sira ne’e kompriende kona-ba lalaok lei sira iha Timor-Leste liu husi ajensia informasaun seluk.

Ho programa peskiza ne’e ekipa tékniku divulgasaun atu bele muda mekanismu no estratejia politika divulgasaun ho maneira ka lalaok ne’ebé simples atu komunidade sira bele kompriende, tanba ho meus ne’e nu’udar resposta ba komunidade ninia direitu hodi asesu ba justisa no oinsa sidadaun timoroan bele ezerze sira nia direitu asesu ba justisa iha Timór-Leste.

Ekipa ba peskiza ne’e hamutuk ema nain 10 no responsavel máximu Celito Cardoso, Diretór Nasionál Direitus Umanus no Sidadania (DNDHC), koordenadór Programa, José Paulino Dias Ximenes, Xefe Departamentu Relasaun Públika no Divulgasaun.