DILI – Sesta-Feira, loron 8 fulan-Maiu 2015, Ministru Justisa Ivo Valente akompaña hosi Diretór-Jeral, Inspetór-Jeral, Diresaun Nasionál Administrasaun no Finansas (DNAF) halo inspesaun ba konstrusaun Edifísiu foun Ministériu Justisa ne’ebé lokalizadu iha Avenida Jacinto Cândido.

Objetivu hosi inspesaun ne’e mak atu hare’e besik prosesu konstrusaun, progressu finalizasaun projetu, hare’e espasu edifísiu, rona rasik hosi kompañia kona-ba “saída” mak sei falta no sá nessesidade urjénti mak tenke halo antes halo inaugurasaun iha fulan-Jullu 2015.

Depoiz halo inspesaun, Ministru Justisa Ivo Valente hateten, edifísiu foun ne’e atinzi ona 90%, sei falta mak instalasaun interiór, kanalizasaun bee-mós no hela halo ligasaun eletrisidade. Aliende restu 10% atu finaliza iha tempu besik ne’e, tanba edifísiu foun ne’e ho ekipamentu no téknolojia ne’ebé modernu, presiza tebes iha formasaun adekuadu ba ita-nia IT sira no lojistiku atu garante nia operasaun lorloron no manutensaun iha futuru.

Espera katak, depoiz inaugurasaun, Ministériu Justisa sei halo ba planu jestaun lojistiku, “oinsá” halo jestaun ba ekipamentu modernu edifísiu ne’e; hateten Ministru Justisa.