DILI – CNA, Sesta-Feira, loron 08 fulan-Maiu 2015, S.E. Ministru Justisa akompañadu hosi Diretór Nasionál Administrasaun no Finansas Crisogno Neto no Diretora Nasionál Rejistu Notariadu Maria Fatima de Araújo halo reuniaun ho Comissão Nasionál Aprovizionamentu (CNA) Ministériu Finansas.

Objetivu reuniaun ne’e koa’lia kona-ba servisu konsultór ka peritus internasionál passaporte eletróniku (e-passport) ne’ebé mak passa ona tuir konkursu ne’ebé hala’o hosi CNA Ministériu Finansas hodi halo avaliasaun tékniku ba proposta produsaun e-passport tuir planu Ministériu Justisa nian.

Ministru Justisa Ivo Valente informa katak, administrativamente, Ardaman Singh Kohli hosi Canada mak passa ona hosi prosesu konkorénsia ne’ebé mak hala’o hosi Comissão Nasionál Aprovizionamentu (CNA). Hamutuk konkorente nain-ualu (8) mak tuir konkorénsia, maibé iha avaliasaun perfoma, integridade, curriculum vitae no kapasidade tékniku tuir estandarte internasionál; Ardaman Singh Kohli hosi Canada mak passa ona. Peritus ne’e sei servisu iha fulan-rua nia laran tuir kontratu no termu-servisu ne’ebé prepara ona hosi Ministériu Justisa no asina ona hosi peritu rasik.

E-passport sei fasilita di’ak liután sidadaun sira wainhira halo viajen ba iha estranjeiru, ho e-passport sei asegura liután seguransa dadus benefisiáriu tanba ho téknolojia biométrika; aliende téknolojia ne’e iha kapasidade detekta impressões dijitál, prevene falsifikasaun dokumentu; e-passport mós nu’udar meius ida atu proteje utilizasaun sala dadus benefisiáriu nian. Ho nune’e, VI Governu liu hosi Ministériu Justisa halo rekrutamentu ba peritu ida hodi halo avaliasaun tékniku antes lori ba implementasaun. Tanba-ne’e, hau fó ona kontratu ba peritu ne’e, hodi nune’e peritu kontratadu hosi Canada komesa ona halo avaliasaun tékniku e-passport, nune’e fulan-rua mai tán ita sei simu relatóriu no hau sei enkmiña ba iha Konsellu Ministru hodi diskute no aprova; esplika Ministru Justisa Ivo Valente.