Iha loron tersa-feira data 22 fulan Abril Tinan 2015 liu bá, pontu fokál pré-deskonsentrasaun administrativa ministériu justisa, banati ba orden hala’o serbisu, ref.n°.972 data 17 fulan abril tinan 2015 no movimentasaun governu nian ema, data 21 fulan abril tinan 2015, husi Diretór Diresaun Nasionál Terra, Propriedades no Serbisus Kadastrais (DNTPSC), hó objetivu viazen hala’o monitorizasaun, identifika mós atividades Diresaun Terra, Propriedades no Servisus Kadastrais (DTPSC) Munisipal, hó nune’e maka ofisiais Diresaun Nasionál Terra, Propriedades no Servisus Kadastrais (DNTPSC), husi área planeamentu no finansas oportuna biban hodi aprezenta fomatu planu asaun anual (PAA), hato’o mós orientasoens relasiona hó serbisu téknikus administrativus espesifikamente finansas no haklaken justifikasaun kona-ba sub alokasaun orsamental trimester darúak tinan fiskál 2015 iha Munisípiu Manatutu.

Iha biban liu bá ekipa ne’ebe hola parte iha monitorizasaun refere maka hanesan koordenador pontu fokál pré-deskonsentrasaun administrativa ministériu justisa, António Verdial de Sousa, Tékniku Profisional Planeamentu no Finansas Diresaun Nasionál Terra, Propriedades no Servisus Kadastrais (DNTPSC), Justo Lafo no Gastão Soares Freitas ne’ebe efetivu tebes hato’o aprezentasaun ba Director hamutuk hó Ofisiais administrasaun no Finansas, hola fatin iha eskritóriu Diresaun Terra, Propriedades no Servisus Kadastrais (DTPSC), Munisípiu Manatutu.

Tuir observasaun pontu fokál pré-deskonsentrasaun administrativa ministériu justisa , serbisu refere lao furak, efisiente, efikas no hamosu kolaborasaun ne’ebe kmanek entre ofisiais nível Nasional no Distrital.

Iha momentu ne’eba koordenadór pontu fokál pré-deskonsentrasaun administrativa ministériu justisa, António Verdial de Sousa, oportuna biban hodi haré didíak eskritóriu refere, hahú husi fatin servisu Diretór hala’o kna’r no hakat husi fatin ida ba fatin sira seluk, nune’e mós lao haleu eskritóriu hodi tau matan husi uma laran to’o aredores liur, haré kondisoens hotu-hotu ne’ebe hetan iha terrenu.

Iha biban ne’eba mós, hó hakmatek rona halerik no lamentasoens ne’ebe hato’o rásik husi Sr. António Cárcerres, Director Terra, Propriedades no Servisus Kadastrais (DTPSC), Munisípiu Manatutu.

Iha biban observasaun koordenadór pontu fokál pré-deskonsentrasaun administrativa ministériu justisa, António Verdial de Sousa, haré kondisoens reais maka iha hanesan fatin servisu, seidauk iha fasilidade hanesan Sofá, Meja Reuniaun, menus kadeira hodi serbisu, armáriu hodi rai ka arkiva dokumentus, eskritóriu tomak sei laiha kortina, seidauk iha ligasaun internet, falta ekipamentus sukat rai ne’ebe sufisiente, falta kamera dizital, seidauk iha kadeira hodi hala’o sorumutu, falta kuadru naran instituisaun DTPSC. Iha mós lamentasoens sira seluk hanesan menus konbustíveis ba viatura no motorizada no buat sira seluk tan maka la sita iha ne’e.

Haré husi liur, eskritóriu DTPSC furak ona, maybe, presiza seguransa pesoal, kliner, lutu.

Situasaun átual kona-ba lutu temporariamente sei didin hela hó kaleng no kaleng hirak ne’e mós, husi parte balun naksobu, monu daudaun ona. Buat hirak ne’e hotu maka akontese, ita haré no sai hanesan kestoens importantes iha DTPSC Munisípiu Manatutu.

Buat sira ne’ebe haklaken sai iha leten ejiji aten berani, fuan bo’ot, laran maus, orientasaun no hatúr iha planeamentu ne’ebe sustentável, husi, lideransa burokrátiku iha hierarkia Ministériu Justisa liu-liu Diresaun Nasionál Administrasaun no Finansas Ministériu Justisa (DNAF-MJ) no Diresaun Nasionál Terra, Propriedades no Servisus Kadastrais (DNTPSC), presiza tau matan iha tempu badak, atu nune’e Ministériu Justisa preparadu, hari’i kondisoens hodi asegura polítika governu ne’ebe estabelese tiha ona DL n◦.4/2014, kona-ba Pré-Deskonsentrasaun Administrativa.