Pontu Fokál Pré-Deskonsentrasaun Administrativa ministériu Justisa hamutuk ho ofisiais Diresaun Nasionál Terras Propriedades no Servisu Kadastrais (DNTPSC) halo observasaun ba edifísiu Munisípiu Manufahi iha loron 2 fulan fevereiru tinan 2015.

Hala’o atividade ne’e bazeia ba Orden Traballu Ref. Nú. 116/1046 no mós Despaxu Diretór Nasionál DNTPSC relasiona ho relatóriu Diretora DTPSC Munisípiu Manufahi kona-ba progresu konstrusaun edifísiu ne’e.

Tuir observasaun Pontu Fokál PDA, Ministériu Justisa, Antonio Verdial de Sousa hateten” edifisiu ne’e seidauk bele entrega iha tempu badak, tanba kondisaun fízika foin atinji mais ou menus 70-80%,”

Iha okaziaun ne’e ekipa traballu, kompostu husi Paulino da Cruz, Xefe Departamentu Administrasaun no Finansa, António Verdial de Sousa, Júlio da Conceição Tílman no Gastão Soares Freitas, ne’ebé halao monitorizasaun ba DTPSC Município Manufahi hodi estabelese formatu Planu Asaun Anuál (PAA) no justifikasaun ba sub alokasaun orsamentu atividade trimester daruak tinan 2015.

Iha oportunidade ne’e koodenadór PDA-MJ, António Verdial de Sousa hamutuk ho ofisiais DNTPSC inklui Júlio Tílman hala’o sorumutuk ho Supervizór abitasaun Obras Públika Munisípiu Manufahi, Aniceto A. T. de Andrade, hodi hetan informasaun téknika kona-ba konstrusaun ne’e. Projetu konstrusaun ne’e hala’o husi Kompañia KABLAKE ENGENERING, Lda hahú iha tinan 2012 to’o oras ne’e seidauk remata.

Supervizór abitasaun Obras Públika Munisípiu Manufahi, Aniceto A. T. de Andrade, hataeten”Hanesan responsável ba Obras Públika sempre monitoriza no distintu Deputadu Parlamentu Nasionál balun mós, mai rasik halo fiskalizasaun, maibe Kompañia fó razaun katak Edifisiu seidauk remata tanba materiál sira tenki hatama husi nasaun Australia no tama tarde”.

Hafoin enkontru ekipa halo observasaun ba konstrusaun edifísiu hodi haré kondisaun real no hasoru malu ho traballadór sira hamutuk ema nain hat no servisu nai’in hirak ne’e informa, katak durante ne’e materiál sempre tama tarde, ho nuné afeta projektu konstrusaun seidauk bele remata.

Antonio Verdial de Sousa
Koordenador Pontu Fokál PDA Ministériu Justisa