DILI – JSMP, S.E. Ministru Justisa Ivo Valente halo lansamentu ba Relatóriu Organizasaun Naun-Governamentál Judicial System Monitoring Programme (JSMP) kona-ba Observasaun Jerál Setór Justisa 2014.

Lansamentu relatóriu ne’e iha momentu aniversáriu JSMP nian ba dala XIV ne’ebé mak hala’o iha Hotel Timor, loron 30 Abril 2015.

Iha seremónia abertura, Ministru Justisa Ivo Valente fó parabéns ba JSMP ne’ebé halo ona tinan 14, JSMP hanesan organizasaun naun-governamental hatudu nafatin ona sira-nia esforsu hodi kontribui ba iha dezenvolvimentu setór justisa. Hanesan organizasaun sosiedade sivíl, JSMP nia papél tempu agora importante tebes hodi kontribui ba iha prosesu dezenvolvimentu justisa no demokratizasaun iha ita-nia rai.

Tinan-tinan sempre tu’ur hamutuk ho JSMP hodi koalia rezulta monitorizasaun ne’ebé sira hala’o, ami avalia beibeik tinan-tinan, hanesan pessoal instituisaun Governu, hau hare’e katak JSMP nia rekomendasaun melhoria razuavél no fundamentu tebes, presiza mak “oinsá” kolaborasaun no apoiu ita hotu-hotu nia hodi aprezenta rekomendasaun sira; hateten Ministru Justisa Ivo Valente.

Ministru Justisa hateten tan, dalaruma rekomendasaun sira ne’ebé ita-bo’ot sira propoin, relativamente ema barak hanoin katak Governu tenki rezolve buat hotu-hotu.

Hau hakarak dehan ba ita-bo’ot sira-hotu, “agora no ba oin, ita presiza muda hanoin sira ne’e, parte balun bele lo’os, Governu nia papél atu hadia sistema justisa, maibé keta hálakon ema-hotu nia partisipasaun hodi hadia ita-nia sistema judisiáriu, katak ita-hotu ne’ebé mak agora dadaun iha ne’e iha mós responsabilidade ida-idak atu hadia ita-nia justisa.”

Tanba dezenvolvimentu justisa laós depende de’it ba instituisaun Estadu sira, maibé kapasidade individual mós determina kualidade justisa ba ita-nia povu, importante mak autór judisiáriu sira komprende didi’ak ida-idak nia papél, hatene di’ak profissionalismu no aproximasaun metodolojia ne’ebé razuavél hodi fó rezolusaun ba área justisa nian, apela Ministru Justisa ba partisipante seremónia lansamentu relatóriu JSMP nian.

Iha nia mensajen ikus, Ministru Justisa hateten, JSMP iha VI Governu Konstitusionál hetan ona apresiasaun di’ak tebes, hau valoriza servisu JSMP, importante mak tenke servisu no halo nafatin rekomendasaun konstrutiva, “oinsá” hamutuk ho sosiedade sivíl sira seluk hodi hadia setór ida ne’e. Hau fiar katak, atu manan esperiénsia iha justisa, sei lori tempu, antes aumenta númeru juíz, prokuradór, defensór, etc.

Ita tenke iha kualidade relatóriu, manan hosi esperiénsia iha servisu diariu, tenke bazeia ba dadus no rezultadu peskiza.

Lansamentu relatóriu 2014 iha setór justisa ne’e importante, tanba ita-nia povu mós komesa kritiku ba servisu autór justisa sira, katak JSMP fahe ona ninia matenek hodi kontribui ba iha dezenvolvimentu justisa, presiza nafatin atu melhora ho dalan partisipa ativamente no komprende situasaun Estadu ne’ebé sei nurak, foin mak ita hari’i, tanba-ne’e, fó solusaun ida nebe adekuadu no rasionabél ba ita-nia sistema.

Diretór Ezekutivu JSMP Luis Oliveira Sampaio iha ninia intervensaun hato’o agradesimentu no apresiasaun ba bainaka sira ne’ebé marka prezensa iha fatin ne’e, atu tuir seremónia aniversáriu no lansamentu ba relatóriu JSMP tinan 2014 ba setór justisa.

Tuir mai, alem-de JSMP hato’o relatóriu iha área justisa hato’o mós rekomendasaun prátiku kona-ba oinsa hametin liután demokrasia no governasaun ba servisu Parlamentu Nasionál (PN) nian durante tinan 2014.

Husu ba PN atu kontinua reforsa demokrasia no promove governasaun di’ak iha Timor-Leste, ho nune’e, JSMP rekomenda atu Deputadu sira tenke kontinua halo fiskalizasaun, no bankada opozisaun kontinua atu kaer metin nia prinsípiu atu kontrola no fiskaliza póder ezekutivu ho kualidade, mesmu ke governu foun (Governu VI) hanesan Governu komprimisu; hateten Luis Oliveira Sampaio.

Diretór Ezekutivu JSMP hatutan, Parlamentu Nasionál sira presiza hadi’ak liután mekanismu fiskalizasaun iha baze, presiza kada semana iha loron Sesta-Sesta, ho nune’e bele fó solusaun ba governu atu proteze planu ne’ebe refleta ba povu nian moris di’ak.

Parlamentu Nasionál no Governu presiza konsidera no analize, no foti desizaun polítiku tuir Konstituisaun no baze légal sira nune’e la hamosu poténsia konflitu ho lei. Prinsipiu ne’e inklui wainhira Parlamentu no Governu produz no aplika rezolusaun sira.

Hodi ensera seremónia ne’e, JSMP lansa livru relatóriu ne’ebé halo hosi Diretór Ezekutivu JSMP Luis Oliveira Sampaio ho Vise-Diretór JSMP Casimiro Dos Santos, no entrega ba instituisaun Estadu sira, membru sosiedade sivíl no partisipante sira-hotu.