MINISTERIO Justisa, Lúcia Maria Brandao Freitas Lobato, husu ba komunidade sira ne’ebé okupa eis kazernas Brimob no Aitarak antes tinan ne’e remata tenki hamamuk. nune’e 2011 bele hahú halao konstrusaun.

Ministra Justisa Lucia Lobato, afirma katak governu sei kompromi ka negosiasaun ho komunidade sira ne’ebe okupa patrimoniu estadu iha area Aitarak-Laran ho Eis kazerna Brimob, Bairo Pite.

“La iha negosiasaun ba osan ne’ebé governu fo, Governu sei la fo tuir deit osan kompensasaun ne’ebé okupantes sira husu,” deklara MJ Lucia ba jornalista sira, Kinta, (21/10), wainhira partisipa iha Dialogu iha Ministeriu Negosiu Estranjeiru, Pantai Kelapa Dili.

Eis Vise Prezidente PSD ne’e afirma tan katak desizaun ne’ebe governu foti ho indiminizasaun, fo diak liu ona ba okupantes sira, tanba iha nasaun barak wainhira ema ruma okupa uma Estadu, tenki selu ba halo arendementu ba Estadu. “TL okupa gratuitu deit, depois husu indiminizasaun” tenik Lucia.

MJ Lucia husu uma kain 8 iha Aitarak Laran, atu abandona ona uma estadu nian molok tinan ne’e remata. “Se sira lakohi sai lei dehan katak governu bele halo despezu administrativu ba okupantes ne’ebé lakohi husik, portantu hau kumpri lei, hau laos halo arbiru deit,” katak nia ba jornalista.

Relasiona ho komunidade iha eis kazerna Brimob tuir ministra, tenki sai ona, tanba sira simu ona kompenizasaun hosi governu. “Kompensasaun simu tiha ona, la hatene osan ne’e gasta hotu ona ka lae, ne’e laos problema governu nian, mas simu ona osan, halo favor husik mamuk fatin hodi halo konstrusaun,” tenik MJ Lucia.

maske hetan ona kompenizasaun maibe, komunidade sira iha area eis Brimob kontinua lamenta tanba governu taka dalan ba sira nia ejijensia i nunka konsidera sira nudár sidadaun Timor Leste, dehan Maria da Costa.

Komunidade eis Kazerna Brimob, tomak la satisfeitu ho osan kompensasaun ne’ebé governu oferese tanba osan ne’e la sufisiente atu sosa rai hodi halo uma. “Folin rai karun teb-tebes, seidauk tan hola material atu halo uma. Kompensasaun rihun rua ($2.000) ne’e la to’o. Lolos governu fo kompensasaun rihun lima $5.000.” Tenik Maria.

Martinha da Conceicao, informa mos katak, ninia parte rekonese uma ne’ebe sira hela ba ne’e
atrimonu estadu, maibe atu hasai sira husi ne’eba tenki ho dignidade. Komunidade sira prontu atu sai husi fatin ne’eba maibe governu tenki mos tau iha konsiderasaun difikuldade ne’ebe sira infrenta.

Komunidade Marcelina Soares, dehan mos katak, to’o ohin loron komunidade barak mak seidauk hetan fatin atu hela ba. Tan ne’e, se governu obriga nafatin atu sira tenke sai ona ho kompensasaun ne’ebe la sufisiente signifika governu hakarak atu aumenta tan kiak.
Entertantu, komunidade sira iha Aitarak Laran kontinua halao asaun protesta iha sira nia bairo oin hodi ejiji nafatin atu governu halo dialogu ho sira.*
Ananias Babo Horta
Media officer