LETEFOHO – SAME, Munisípiu Manufahi, Kinta-Feira, loron 16 Abril 2015, Ministru Justisa Ivo Valente reprezenta S.E. Primeiru Ministru RDTL Dr. Rui Maria de Araújo inaugura Uma Dame Manufahi ne’ebé lokalizadu iha Suku Letefoho, Bairo Boraixa Laran, Munisípiu Manufahi.

Uma Dame Manufahi ne’e hari’i hosi Organizasaun Naun-Governamentál Centro Páz ba Dezenvolvimentu (CEPAD) ho fundu Governu nian liu hosi Assessoria Sosiedade Sivíl ho montante osan hamutuk vinte-sinku mil doláres amérikanu (US$25,000). Uma Dame ne’e nu’udar demanda komunidade nian atu bele iha espasu propiu ida hodi nune’e bele fasilita sira ba iha rezolusaun problema konflitu sira ne’ebé akontese iha Munisípiu Manufahi, liu-liu iha área Suku Letefoho.

Ministru Justisa iha serimónia inaugurasaun Uma Dame Manufahi lori VI Governu Konstitusionál nia naran fó-nia apresiasaun no agradesimentu ba Organizasaun Naun-Governamentál Centro Páz ba Dezenvolvimentu (CEPAD) ne’ebé mak hamutuk ona ho kumunidade sira hodi buka ona meius hotu-hotu ba rezolusaun problema konflitu iha Munisípiu Manufahi.

Iha impresaun barak katak, sosiedade sivíl hatene deit mak kritika no la-halo solusaun, maibe hau hakarak dehan katak, CEPAD hatudu solusaun balun ona ba konflitu, ne’e direitamente no indireitamente ajuda ona Estadu hodi kontribui ba iha dezenvolvimentu páz iha Timor-Leste, hateten Ministru Justisa Ivo Valente wainhira fó ninia intervensaun hodi inaugura Uma Dame Manufahi iha Letefoho.

Ivo Valente hatutan katak, Uma Dame Manufahi nu’udar dalan balun hodi fó solusaun ba setór justisa. Kustume faz parte matenek-lokál (local wisdom) ne’ebé uluk kedan iha ona iha ita-nia sosiedade nia le’et, ita presiza atu promove no haburas nafatin. Ezemplu, uzu matenek-lokál sira hodi rezolve problema disputa rai, rezolve baliza rai, etc. Uzu kustume ba rezolusaun konflitu iha komunidade nia le’et bele hákma’an liután prosesu formál sira iha Tribunál, agora kazu barak mak pendente no sei hein hotu desizaun Tribunál presiza tempu tanba ita-nia Tribunál sei hasoru hela limitasaun oioin kona-ba rekursu umanus no infra-estrutura. Ita presiza hametin valores kultura diak sira ne’e, “saída” mak bele rezolve iha komunidade ho meius kustume, ita tenke kontinua haburas no ‘saída” mak tenke lori ba iha área formál nian, área Tribunál hodi hákotu.

Iha futuru, desizaun sira iha prosesu uzu kustume bele ajuda diak liután hodi hákotu desizaun iha Tribunál, hateten Ministru Justisa.

Tuir Diretór Ezekutivu CEPAD João Boavida katak, tempu naruk tebes realiza mehi ba Uma Dame ida ne’e. Hahu hosi 2007 liu hosi meius Focus Group Discussion iha nivél komunidade, dialogu ho Governu no Parlamentu Nasionál kona-ba kauza konflitu ne’ebé sempre mosu kuaze tinan rua-rua iha Timor-Leste. Ami halo atividade sira iha distritu 13 hodi buka hatene kauza konflitu no promove dame. No ohin ita konsege konkretiza mehi Uma Dame ida tan iha Munisípiu Manufahi ne’ebé mak lokalizadu iha Suku Letefoho hanesan mós iha Munisípiu lubun ida ne’ebé ami hari’i ona.

Tanba-ne’e, hau fó hau nia agradesimentu ba Governu Nasionál no Munisípiu ne’ebé mak fó ona apoiu hodi hari’i Uma Dame ida ne’e, aumenta João Boavida.

Iha prosesu inaugurasaun Uma Dame Manufahi, iha tempu mak hanesan, halo lansamentu ba Internet Komunitáriu ne’ebé oferese hosi Kompania Timor Telecom no entrega livru “Baino ho Binoi” ne’ebé produz hosi CEPAD ba Diretór Eskola Primaria Letefoho.

Inaugurasaun Uma Dame Manufahi ne’e partisipa hosi Vise-Presidente Parlamentu Nasionál Aderito Hugo, Presidente Global Organization of Parliamentarians Against Corruption (GOPAC) Parlamentu Nasionál Timor-Leste Francisco Miranda Branco, Sekretáriu Estadu Terras Propriedades Jaime Xavier Lopes, Diretór Ezekutivo CEPAD João Boavida, Adjuntu Administradór Munisípiu Manufahi Arantes Isac, Diretóres Nasionál no Munisípiu, PNTL, Estudánte Primaria sira, Profesores, Xéfi Suku sira, Xéfi Aldeia sira, lider tradisionál sira, no komunidade Letefoho.