Dili, Iha loron Quarta-feira, 15 Abril 2015, ekipa husi Ministério da Justiça, ne’ebe lidera husi Diretor Direcção Naçional de Assessor Jurídica e Legislação (DNAJL) Ministériu da Justisa (MJ), Nelinho Vital, halo diskusaun ho Deputadu sira husi Komisaun A-Parlamento Nacional nian konaba ba Proposta Alterasaun ba Lei Konaba Regime Jurídico da Advocacia Privada e da Formação dos Advogados. Aleinde reprezenta Ministro da Justiça, iha diskusaun ne’e, Sr. Nelinho Vital hola mos pozisaun hanesan Presidente ba Conselho Gestão e Disciplina da Advocacia (CGDA) nian. Ho nune’e, iha diskusaun ne’e, konsege hamosu pozisaun balun ne’ebe la konkorda proposta alterasaun ne’ebe hato’o husi deputadu proponente sira, maibe iha sorin seluk iha mos pozisaun ne’ebe konkorda mos buat balun ho proposta alterasaun ne’e.
Tuir Nelinho Vital ne’ebe reprezenta MJ iha ne’e hatete katak: “la persiza ona halo tan alterasaun ba lei no.11/2008. Tamba ba agora dadaun ne’e, MJ aprezenta tiha ona proposta lei konaba Ordem Advogado Timor Leste nian ba iha Conselho dos Ministros no Lei ne rasik sei revoga tiha lei no.11/2008 kuandu Presidente Republika aprova no publlika ona”. Aleinde ne’e, MJ iha nafatin hanoin ida katak, tengki halo tratamento hanesan ba advogado husi rai liur nomos Timor oan sira. Ho nune’e, formasaun iha Centro Formação Jurídica (CFJ) hanesan dalan ida obrigatoriu atu bele hasa’e kualiadade advogado sira nian nomos atu garante harmonizasaun ba advogado sira, salient liu tan Nelinho.

Iha sorin seluk, hodi Conselho CGDA nian naran, aprezenta mos proposta foun balun atu altera tiha data limitasaun ba rejistu ba advogado Timor oan sira. Sr. Nelinho esplika liu tan katak, “wainhira data limitasaun atu Tribunal hasai certidão konaba rekonhesimento ba advogado ida nia k’nar la muda, ne’e sei fó nafatin impaktu ba advogado Timor oan sira ne’ebe ezerse ona sira nia funsaun hanesan advogado husi tempu UNTAET nian mai to’o 31 Dezembro 2012, atu ba rejistu iha CGDA. Tamba data ikus atu husu certidão husi Tribunal ne’e maka 31 Marsu 2013”.
Diskusaun ne’ebe hala’o durante horas 3 nia laran ne’e, hamosu duni debate ida ne’ebe klean ba proposta alterasaun ne’e, entre Deputado sira ho ekipa MJ nian nomos ekipa husi CGDA rasik. Sra. Presidente Comissão A-PN nian mos husu ba MJ atu bele aprezenta mos ba deputado Komisaun nian konaba esbosu lei Ordem Advogado Timor Leste. Atu nune’e bele sai mos hanesan referensia ida molok atu halo alterasaun ba Lei no.11/2008 ne’e. Marka mos presenza iha diskusaun ne’e, Diretora CFJ, Sra. Marcelina Tilman nomos ekipa tekniku legal husi DNAJL.
(Mize Correia/DNAJL)