MINISTRU JUSTISA IVO VALENTE ENTREGA MAPA TOPOGRÁFICO OÉ-CUSSE BA ZEESM
Dili – Loron 31 Marsu 2015, Ministru Justisa, Ivo Valente halo reuniaun ho Sekretáriu Rejionál Assuntu Ordenamentu Territóriu no Kadastru Zona Especial de Economia Social de Mercado (ZEESM) Rejiaun Administrativa Espesiál Oé-Cusse Ambeno, Pedro de Sousa Xavier iha Ministériu Justisa.
Reuniaun entre Ministru Justisa ho Sekretáriu ZEESM ne’e akompaña hosi Diretór Nasionál Terras Propriedade e Servisu Kadastrais Ministériu Justisa, Romão Guterres no Diretora Nasionál Rejistu Notariadu, Maria Fatima de Araújo.
Objetivu hosi reuniaun ida ne’e hodi hametin nafatin liña koordenasaun servisu entre Ministériu Justisa ho ZEESM iha setór justisa nian. “Ami koalia kona-ba apoiu setór justisa nian; liu-liu iha área atendimentu públiku; relasaun ho emissaun ba Bilhete Identidade (BI), passaporte hodi fasilita povu Rejiaun Administrativa Espesiál Oé-Cusse hodi halo passa-fronteira.
Nune’e mós ami koalia kona-ba reseita ne’ebé ZEESM kobra dadaun, ZEESM informa katak komesa simu ona impostu hosi arendamentu rai no uma Estadu nian,“ informa Ministru Justisa, Ivo Valente iha ninia fatin servisu Ministériu Justisa.
Ivo Valente hatutan katak, reseitas hosi impostu nu’udar reseitas ZEESM nian tuir Decreto-Lei nú. 3/2014; ne’ebé mak fó biban ba ZEESM atu halo kobransa ba impostu, reseita sira ne’e sei ba hotu iha Konta ZEESM nian.
Informasaun ohin hosi ZEESM mai Ministériu Justisa diak tebes, ne’e passu diak idatán ba Rejiaun Administrativa Espesiál Oé-Cusse nu’udar rejiaun autonómu, ho nune’e neneik Oé-Cusse sei finansia nia án rasik, nune’e mós sei fó biban hodi halo alargamentu investimentu iha futuru.
Além-de koalia kona-ba atendimentu públiku no reseitas ZEESM nian, Ministru Justisa ofisialmente entrega mós Mapa Topográfico ba Sekretáriu ZEESM hodi ilustra área Enklave Oé-Cusse.
Mapa Topográfico ne’e hanesan rezultadu hosi prosesu servisu mapeamentu/ kadastrais Ministériu Justisa hodi hatu’ur mapa ba estrada, mota, baleta, uma no sel-seluk. Ho Mapa Topográfico, sei bele ajuda diak liután dezenvolvimentu ZEESM iha Rejiaun Espesiál Oé-Cusse lalais liután.
