Pontu Fokál Pré-Deskonsentrasaun Administrativa (PDA) Ministériu Justisa ne’ebé nu’udar membru Grupu Tékniku Traballu Inter-Ministeriál (GTTIM) partisipa iha enkontru konvokatoriu hodi diskute kona-ba esbosu Proposta Dekretu-Lei Rejime Finanseira ba Implementasaun Deskonsentrasaun Administrativa. Enkontru ne’e hala’o iha Salaun VIP Ministériu Administrasaun Estatál Díli, iha loron 8 fulan Abril tinan 2015.
Iha enkontru ne’e António Verdial de Sousa hateten, “hau kestiona kona-ba tempu ne’ebé atu implementa dekretu-lei ne’e iha tinan 2016 nia laran, bele ka lae. Nune’e mós Verdial hatutan tan kona-ba implementasaun dekretu-lei Sistema Jestaun Finanseira ba Munisípiu ne’e iha tinan 2016, maibé oinsá ho Jestór, Sekretáriu no funsiunáriu munisípiu sira ne’ebé relasaun ho jestaun finanseiru tenke hetan formasaun iha área ne’e.”
Tuir Diretór Jerál Ministériu Administrasaun Estatál, Miguel Pereira de Carvalho ne’ebé lidera enkontru ne’e hateten, “Ministériu ida-idak halo planu orsamentu ba atividade hanesan bai-bain, hafoin Komisaun Revizaun Orsamentu (CRO) mak sei hasai hodi tau iha munisípiu sira.”
Hafoin diskute Esbosu ne’e, Grupu Téknika Permanente Nasionál (GTPN) hato’o proposta oráriu kona-ba enkontru kada Ministériu hotu hotu, tuir planu GTPN katak sei halo enkontru ho Ministériu Justisa iha loron 28 fulan Abril tinan 2015, (se Ministru laiha tempu iha loron ne’e bele muda molok semana ida).
Membru GTTIM husi Ministériu Justisa, António Verdial de Sousa, Marino Corte Real Tilman no João Maupelo da Costa inklui reprezentante Diretór DNAF Ministériu Justisa, Marciano Maliloe.

João Maupelo da Costa
Pontu Fokál PDA