Dili , Iha loron Sexta-feira, 27 Março 2015, ekipa husi International Cooperation Department (ICD) Ministériu Justisa (MJ) Japaun, ne’ebe kompustu husi Yoshitaka Watanabe (Profesor-ICD), Horishi Suda (Procurador-ICD), Mohiko Yui (Lejisladora-ICD) nomos Profesor Emeritus Masakatsu Adachi (Universidade Kanto Gakuin), halo vizita kortezia ida ba Direitor Geral Ministério da Justiça Timor Leste, Sr. Henrique Ximenes, iha edifisiu sentral MJ, Caicoli Dili.

Iha vizita ne’e, parte rua koalia liu konaba oin nusa atu hametin liu tan kooperasaun entre MJ Timor Leste ho MJ Japão (G to G). Sr. Henriqeu, hanesan DG foun iha MJ, hato’o mos nia agredesimentu ba MJ Japão ne’ebe ho laran luak suporta ona MJ Timor Leste, liu-liu iha area lejislasaun (estudu komparativu iha parte lei), ne’ebe implementa desde tinan 2009 ne’e.

Tamba husi estudu komparativu ne’e, MJ Timor Leste konsege produs duni lei balun hanesan, Lei konaba Kombate Droga nian, ne’ebe Japão sai hanesan referensia bot ba Timor Leste, nia sublina liu tan.

Iha sorin seluk, Sr. Watanabe, hanesan Xefe Ekipa husi ICD MJ Japão, hato’o mos sira nia kompremisu bot hodi hametin nafatin kooperasaun entre parte rua ne’e, tamba tuir nia katak, sira aprende-mos buat barak husi Timor Leste, liu-liu konaba nia sistema lejislasaun nian.

Hafoin, vizita ida ne’e, ekipa husi ICD Japão ne’e, halo mos vizita no sorumutu teknika ho Direitor no ekipa husi Direcção Naçional de Assessor Jurídica e Legislação (DNAJL) Ministériu da Justisa (MJ) nian.

Iha sorumutu ne’e, koalia liu konaba avaliasaun ba kooperasaun durante ne’e entre DNAJL ho ICD iha parte justisa juvenile nomos atu haré fali ba implementasaun estudu komparativu seluk iha futuru mai.

Diskusaun durante horas tolu nia laran ne’e, konsege hamosu duni konkordansia balun hanesan kontinuasaun suporta teknika ba preparasaun lei justisa juvenile.

Soruutu ida ne’e remata ho troka prenda hanesan zeitu solidariedade entre parte rua nian.


(Mize Correia/DNAJL)