Dili, Iha loron Kuarta no Kinta-feira, 25-26 Março 2015, Direcção Naçional de Assessor Jurídica e Legislação (DNAJL) Ministériu da Justisa (MJ) halo diskusaun ba esbosu Lei Justiça Juvenile hamutuk ho ekipa lejislador husi International Cooperation Department (ICD) Ministériu Justisa (MJ) Japaun.

Diskusaun ida ne’e rasik hetan mos partisipasaun husi instituisaun relevante sira seluk hanesan Diresaun Protesaun Labarik-MSS, Juiz husi Tribunal Recurso, Procuradora, Diresaun Prizaun-DNSPRS, ALFELA no seluk tan. Diskusaun ne’e hala’o iha Centro Formação Jurídica (CFJ) Caicoli-Dili.

Ekipa husi ICD-MJ Japaun ne’e, kompustu husi Yoshitaka Watanabe (ICD), Horishi Suda (ICD), Mohiko Yui (ICD nomos Profesor Emeritus Masakatsu Adachi (Universidade Kanto Gakuin).

Ekipa rua ne’e hamosu diskusaun ne’ebé klean no naruk hodi hare liu kona ba esbosu Lei Justisa Juvenile, ne’ebe jurista Timor oan sira iha DNAJL prepara ona ne’e.

Diskusaun ne’e atu fó hanoin ba malu, liu-liu husi matenek nain Japaun nian konaba sistema juvenile ne’e rasik nomos halo estudu komparasaun ba sistema justisa juvenile iha Japaun, ne’ebe ikus mai buka dalan atu hadia diak liu tan ba artigu no aliña balun iha nia konteudu ne’ebe ladaun iha relevante ho kondisaun Timor-Leste nian.

Rohan husi diskusaun ne’e, ekipa husi MdJ Japaun, halo mos visita ida ba Prizaun Becora, atu hodi rona no hare besik liu tan konaba ita nia sistema prizional, liu-liu nakait ho direitu labarik nian. Iha vizita ne’e, simu direitamente husi Direitor Establesimentu Prizional Becora, Sr. João Domingos.

Antes atu vizita ba sela labarik nian, hala’o mos diskusaun badak konaba kondisaun jeral labarik sira ne’ebe konflitu ho lei.

Ekipa Japonese nian, liu-liu Prof. Adachi hatete katak, se nia halo komparasaun ba kondisaun prizaun Becora iha tinan 2002 no tinan 2015, iha mudansa ida signifikante tebes.

(Mize Correia/DNAJL)