Dili, loron Sesta-Feira, 13 Marsu 2015, Ministru Justisa Ivo Valente simu vizita kortezia Embaixadóra Estados Unidos de América (EUA) Karen Clark Stanton iha Ministériu Justisa, tuku 10:00 dadersan.

Ministru Justisa informa katak, Embaixadóra Amérika nia vizita kortezia primeiru ne’e hodi hato’o nia-parabéns no deseja susesu ba Ivo Valente núdar Ministru Justisa foun bá VI Governu Konstitusionál RDTL. “Hanesan Ministru Justisa, hau mós fó ita-nia apresiasaun bo’ot ba Governu no Povu Amárikanu sira ne’ebé mak durante ne’e fó sira-nia apoiu mai Timor-Leste, liu-liu iha área justisa,” hateten Ivo Valente.

Iha enkontru ne’e, Embaixadóra Amérika no Ministru Justisa koalia mós posibilidade apoiu hosi Governu Amérika nian ba Polísia Sientífika ba Investigasaun Kriminál Timor-Leste (PCIC) hodi oferese formasaun, liu-liu iha área tékniku laboratóriu nian.

Iha biban ne’e, Ministru Justisa fahe mós informasaun kona-ba metas balun ne’ebé mak Ministériu Justisa sei atinzi iha tempu badak nia laran mak hanesan; aprovasaun ba Lei Rai, Lei Expropriasaun, Fundu Finaseiru Imobiliáriu, Lei Tráfiku Umanu, no sel-seluk tan. "Ami koalia mós programa kona-ba alargamentu mapa judiasiáriu no mós háluan Defensória Públiku iha munisípiu sira, katak planu Ministériu Justisa iha tinan ne’e (2015) sei loke tan Defensória Públiku iha Munisípiu Bobonaro no Ermera," hatutan Ivo Valente.