Dili, loron Quarta-Feira, 11 Marsu 2015, Ministru Justisa Ivo Valente simu vizita kortezia Embaixadór Australia iha Timor-Leste Peter Heixard iha Gabinete Ministru Justisa, iha tuku 15:00 lokoraik.

Embaixadór Australia Peter Heixard iha ninia vizita kortezia primeiru ne’e hodi hato’o nia-parabéns no deseja susesu ba Ivo Valente núdar Ministru Justisa foun bá VI Governu Konstitusionál RDTL.

Além de hodi fó-parabéns, Embaixadór esplika mós ba Ministru Justisa kona-ba apoiu Australia ba Timor-Leste iha setór justisa durante ne’e, liu-liu iha área prevensaun no kombate violénsia doméstika, apoiu Australia nian ba iha Polísia Nasionál Timor-Leste (PNTL) no koalia mós asuntu assesu ba justisa ba povu iha área remota no vulnerável sira.

Enkontru ne’e ho ambiente amizavél, hatudu mós espíritu paiz viziñu ne’ebé mak sempre iha inter-dependénsia ba malun.

Iha enkontru ne’e, Ministru Justisa Ivo Valente hato’o nia-apresiasaun ba Embaixadór nia vizita no agradese mós ba Governu Australia nia apoiu ba Governu Timor-Leste.

Ivo Valente hateten katak, “hau apresia ho apoiu tomak hosi Australia, hanesan nasaun viziñu, Timor-Leste ho Australia merese duni atu hametin beibeik ninia lasu-amizade iha área oi-oin, liu-liu setór justisa iha ámbitu solidaredade.”