Dili, loron Quarta-Feira, 11 Marsu 2015, Ministru Justisa Ivo Valente simu vizita kortezia Embaixadór Portugal iha Timor-Leste Manuel de Jesus Gonçalves iha Gabinete Ministru Justisa.

Primeira vizita kortezia ne’e, Embaixadór Portugal Manuel de Jesus Gonçalves hato’o nia-parabéns ba Ivo Valente, ne’ebé simu knár foun núdar Ministru Justisa bá VI Governu Konstitusionál RDTL, nune’e mós deseja sussesu ba servisu Ministériu Justisa. Enkontru ne’e ho ambiente amizavél, hatudu espíritu paiz maun-alin, atravez koalia asuntu kooperasaun servisu balun mak hala’o ona durante ne’e, Ministru Justisa no Embaixadór Portugal koalia “oinsa” mak estabelese protokolu foun ba kooperasaun iha área justisa entre Timor-Leste ho Portugal.

Alem de protokolu kooperasaun entre rai rua ne’e, koalia mós “oinsa” apoiu Governu Portugal nian ba Polísia Sientífika ba Investigasaun Kriminál Timor-Leste (PCIC) no mós preparasaun Simeira/ Konferénsia Internasionál CPLP ne’ebé mak sei hala’o iha loron 22 to’o 23 Juñu 2015. Embaixadór Portugal informa mós katak, Ministra Justisa Portugal aseita ona data ne’ebé determinadu.

Iha enkontru ne’e, Ministru Justisa Ivo Valente hato’o nia-apresiasaun no agradesimentu ba Governu Portugués ne’ebé foti ona parte konstrusaun Estadu RDTL, liu-liu iha setór justisa. Governu Portugal involve no hahu kedan ona forma kuadru rekursu umanus Timor-oan lubun ida depois independensia, forma mós téknika profesionais sira hodi haforsa setór justisa iha Timor-Leste. “Importante tebes kooperasaun ne’e, tanba-ne’e, Timor-Leste sei mantein no kontinua halo kooperasaun ho Governu Portugal iha setór justisa iha tinan hirak tuir mai,” hateten Ivo Valente.