Dili, loron Kinta-Feira 05 Marsu 2015, Ministru Justisa Ivo Valente ho Sekretáriu Estadu Terras no Propriedades (SETP) Jaime Xavier Lopes hasoru S.E. Presidente-Repúblika Taur Matan Ruak hodi aprezenta relatóriu Ministériu Justisa nian.

Aprezentasaun relatóriu ne’e mós hodi responde Presidente-Repúblika ninia konvite no ejijensia wainhira fó-posse ba Membru VI Governu Konstitusionál ne’ebé hala’o iha Salaun Palásiu Nobre iha loron 16 Fevereiru 2015 liubá.

Depois audiénsia ho Presidente-Repúblika, Ministru Justisa hato’o ba mídia katak, “ohin ami hasoru Presidente-Repúblika hodi informa kona-ba atendimentu públiku, liu-liu asuntu disputa rai, inklui mós atendimentu passaporte, Bilhete Identidade (BI) ne’ebé Governu sei háluan to’o iha munisípiu sira iha tempu badak nia laran,” dehan Ivo Valente iha Palásiu Presidensiál Nicolau Lobato.

Nia hatutan, prosesu atendimentu hirak ne’e sei háluan to’o iha munisípiu-sira mak hanesan Munisípiu Baucau, Ermera, Viqueque no Lautem.

Ho nune’e sei háfasíl sidadaun sira hotu atu trata sira-nia dokumentu iha sira-nia munisípiu ida-idak, ita-nia povu la-presiza atu to’o mai hotu iha Dili hodi trata sira-nia dokumentu sira.

Kona-ba servisu “saida deit” mak halo ona depois simu-posse ba VI Governu Konstitusionál, Ministru Justisa Ivo Valente esplika katak, hau mós informa ona ba Presidente-Repúblika kona-ba servisu ne’ebé mak halo durante semana-rua ne’e, liu-liu medida propiu balun ne’ebé Ministériu Justisa foti hodi la’o ba oin.

Sua Excelénsia Presidente-Repúblika Taur Matan Ruak enkoraza no fó motivasaun ba setór Justisa atu bele aselera liu tan papel justisa nian hodi nune’e povu asesu ba iha justisa, inklui haforsa liu tan sistema justisa formál no iha futuru bele hari’i mós sistema justisa informál/ justisa tradisionál hodi fó biban apoiu ba lei formál sira.

Ivo Valente informa mós katak, sei re-inkamiña prospota Lei Droga, Pákote Lei Bens Imóveis (Lei Rai) no lei seluk hamutuk 9 ne’ebé mak sei ba iha Konsellu-Ministru (KM) hodi foti konsiderasaun. Konsellu-Ministru sei submete Pákote Lei Rai nian ba iha Parlamentu Nasionál hodi halo diskusaun detallada, kada artigu, antes lori ba aprovasaun.

“Ami mós tenta sei possível iha semena-oin, ami mós re-inkamiña ba Konsellu-Ministru lei sira seluk hanesan mak hanesan Lei Droga, Lei Organizasaun Judisiária ne’ebé ami identifika ona kuaze proposta 9 mak ami sei husu atu ájenda iha Konseilu-Ministru,” aumenta Ministru Justisa.

Relasaun ho kooperasaun setór justisa Timor-Leste ho Portugal, Ministru Justisa hateten, foin dadaun ne’e, Timor-Leste re-formula ona kooperasaun entre Timor-Leste ho Portugal, liu hosi kontátu Ministériu Negósiu Estranjeiru no ita-nia Embaixadóra Timor-Leste iha Portugal Maria Paixão atu esforsu halo kontátu hodi hare’e posibilidade re-formula protokulu foun kooperasaun ida nee, afirma Ivo Valente.