Dili, loron 03 Marsu 2015 iha Edifísiu Ministeriu Justisa, Ministru Justisa Ivo Valente simu vizita delegasaun nain 4 ne’ebé lidera hosi Embaixadór Brazil iha Timor-Leste, José Amir da Costa Dornelles no akompaña hosi Agência Brasileira de Cooperação (ABC) Paulo Lima, Armando Vieira no mós Andre Rafael dos Santos. Delegasaun ne’ebé mai ho ámbitu kooperasaun hodi konkretiza servisu ne’ebé mak Ivo Valente halo ona wainhira sei asumi Vise-Ministru Justisa depois de vizita Kapital Brazil iha fulan-Jullu 2013 liubá. Iha vizita delegasaun hosi Timor-Leste ba iha Brazil tempu ne’ebá, Ivo Valente konvida Agência Brasileira de Cooperação atu fó apoiu ba área kapasitasaun Lingua Portuges ba kuadru tekníku no funsionáriu públiku iha Ministériu Justisa.

Enkontru ho ABC hatudu klima ne’ebé amizável tebes, Ministru Justisa husu ba ABC atu fó apoiu hodi hari’i Laboratóriu Lingua Portuges iha Centro Formação de Jurídica (CFJ) Kaikoli. Estabelesimentu Laboratóriu Lingua Portugues tenke kompleta ho ekipamentu tekníku no materiais ba aprendizagem nian no mós presiza tebes atu instala ekipamentu mínimu hodi fó apoiu ba ema nain 15 (sanulu resin lima). Tuir planu instalasaun laboratóiu ne’e sei hahu iha fulan hirak tuir mai.

Agência Brasileira de Cooperação ne’ebé lidera hosi Paulo Barbosa Lima ho ekipa hatudu vontade forte atu fó apoiu ba kapasitasaun iha área Lingua Portuges ba iha kuadru tekníku no funsionáriu Publikú Ministériu Justisa.

Embaixadór Brazil José Amir da Costa Dornelles husu informasaun mós kona-ba “oinsa” prosesu no planu produsaun Lei Juvenil no Sentru Juvenil iha Timor-Leste. Ministru Justisa hateten katak, esbosu Lei Juvenil agora sei iha prosesu konsultasaun públiku ho entidade oioin, nune’e mós Governu, liu hosi Ministériu Justisa halo ona planu hodi hari’i Sentru Juvenil iha Tibar.

Iha vizita ne’e mós koalia kona-ba akordu entre Defensoria Públiku Jeral nasaun rua nian, Timor-Leste no Brazil iha área interkambiu entre instituisaun rua ne’e.

Interkambiu sei halo iha fulan nee’, nune’e mós Defensoria Públiku Jeral Timor-Leste sei halo estájiu iha Brazil tuir akordu ne’eb’e halo tiha ona. Iha enkontru ne’e, Defensór Públiku Dr. Sergio Hornai akresenta kona-ba orsamentu ba Defensór Estájiariu-sira ne’ebé mak sei halo estájiu iha Brazil. Relasaun ho kooperasaun ne’e, Ministru Justisa Ivo Valente sei asina akordu kooperasaun ida entre Defensoria Públiku Jeral Timor-Leste ho Brazil iha semana oin mai.