Dili, loron 02 Marsu 2015, tuku 14:30 lokoraik, Ministru Justisa Ivo Valente lidera no orienta hela reuniaun Konsellu Konsultivu (KK) Ministériu Justisa iha Sala Reuniaun Ministériu nian.

Reuniaun KK ne’e partisipa hosi Diretór Nasionál-sira, Diretór Jeral no Inspetór Jerál iha ámbitu Ministeriu Justisa, ho ajenda únika mak diskute kona-ba alterasaun Dekretu Lei Orgánika Ministériu Justisa, Decreto-Lei No. 2/2013. Rezultadu hosi reuniaun ne’e, iha tempu besik mai sei submete ba iha reuniaun Konsellu Ministru ne’ebé lidera hosi S.E. Primeiru-Ministru Dr. Rui Maria Araújo.

Alterasaun Dekretu Lei Orgánika Ministériu Justisa importante tebes atu ajusta ba iha estrutura ne’ebé VI Governu Konstitusionál trasa ona. Ministru Justisa Ivo Valente iha ninia intervensaun HATETEN katak, “alterasaun Lei Orgánika Ministériu Justisa importante, artigu ne’ebé tenke halakon mós mak artigu 39 kona-ba existensia Vise-Ministru Justisa. Nune’emós atu hare’e ba ejijensia serbisu Ministru Justisa no Estatutu VI Governu Konstitusionál ne’ebé hábadak estrutura Governu nian liu-liu hodi kontribui ba iha polítika governasaun ne’ebé efikaz no efisiente.”

Depos de intervensaun hosi Ministru Justisa, Diretór Diresaun Nasionál Assessoria Jurídica no Legislação (DNAJL) Nelinho Vital halo aprezentasaun kona-ba estrutura Lei Orgániku Ministériu Justisa prezente no esbosu alterasaun.

Diskusaun no idéia sira la’o diak tebes, diretór ida-idak hato’o sira nia pontu-de-vista ba alterasaun artigu sira mak sei akontese no mós ninia implikasaun ba iha funsionamentu servisu iha ámbitu Ministériu Justisa. Ikus mai, KK deside esbosu alterasaun sei limite ba iha Diresaun Jeral hat (4) tuir nessesidade agora no iha futuru mai, maibe wainhira hetán aprovasaun hosi Konsellu Ministru só bele implementa iha tinan 2016.