Dili, loron 02 fulan-Marsu 2015, Ministru Justisa Ivo Valente hala’o vizita no inspesaun urjenti ba iha Diresaun Registu Notariadu Munsípiu Dili no Diresaun Nasionál Registu Notariadu.

Iha ninia vizita ne’e, Ivo Valente hateten katak, “inspesaun ne’e atu hare’e besik prosesu atendimentu públiku ne’ebé mak durante ne’e ema-barak kestiona.

Além de hodi hatene “saida” mak akontese iha servisu notariadu durante ne’e, liu-liu mekanismu foun atu aselera produsaun Bilhete Identidade (BI), passaporte, sertidaun RDTL no sel-seluk tan; hodi hatene mós funsionamentu notáriu.”

Iha Vizita Registu Notariadu Munsípiu Dili, Ministru Justisa akompaña hosi Diretór Diresaun Registu Notariadu (DRN) Vitor Neto ba hare’e rasik jestaun ba sidadaun sira wainhira forma hodi trata Bilhete Identidade (BI), rona mós prosesu servisu administrativu, “oinsa” liña koordenasaun entre Munisípiu no diresaun sentrál, liu-liu mós fó hatene regras ezekusaun orsamentu nian.

Diretór Vitor Neto, DRN Munsípiu Dili, informa ba Ministru katak, funsionárius permanente agora hamutuk ema nain 11, kázuais ema nain 4, no sei falta funsionáriu ida (1) tan atu nune’e bele fó apoiu servisu ba produsaun BI.

Inklui mós informa katak, iha sala ba produsaun BI, ár condicionado (AC) a’at nune’e makina labele halo produsaun barak iha loron-ida tanba makina manás.

Tanba-ne’e mak Registu Notariadu bele produz deit BI ba ema 30 iha loron-ida.

Diretór DRN Munsípiu Dili mós husu Ministru Justisa nia apoiu halo reparasaun ba AC no aloka meius transporte motorizada ba munisípiu ne’e hodi nune’e bele fasilita servisu funisionáriu sira iha tereñu.

Depois de vizita DRN Munisípiu, iha tuku 10:27 dader, Ministru Justisa Ivo Valente kontinua hala’o vizita no inspesaun mak hanesan ba iha Diresaun Nasionál Registu Notariadu (DNRN) iha Bebora Dili.

Vizita ne’e akompaña hodi Diretora Nasionál DNRN Maria Fatima de Araújo, hodi hare’e mós servisu Diresaun Nasionál Registu Notariadu.

Ivo Valente, tama-sai ba departementu ida-idak, hare’e prosesu servisu funsionáriu sira, koalia ho sira no “oinsa” atendimentu públiku iha departementu passaporte no Bilhete Identidade (BI) nian.

Ministru Justisa iha ninia vizita iha DNRN, kestiona mós arkivu ne’ebé mak seidauk organizadu, no mós fatin no espasu ne’ebé kiik tebes.

Hodi hakotu ninia vizita urjenti ne’e, Ministru Justisa Ivo Valente informa mós katak, “iha loron 27 fulan-Marsu 2015, sei loke atendimentu BI iha Munisípiu Baucau, tempu besik mai sei loke tan mós iha Munisípiu Ermera.

Objetivu hosi atendimentu BI to’o iha nível munisípiu ne’e nu’udar dalan hodi fasilita sidadaun sira ho diak liu tan, no lori atendimentu públiku besik liu ba povu hotu-hotu iha territoriu laran tomak.