Loron Kinta-Feira, 26 Fevereiru 2015, Ministru Justisa Ivo Valente hala’o sorumutu ho ekipa bo’ot ne’ebé mai hosi Programa das Nações Unidas para o Desenvolvimento (PNUD) Timor-Leste iha Ministériu Justisa.

Sorumutu ne’e amizavél tebes, além de PNUD hakarak kongratula Ivo Valente tanba asume kargu Ministru Justisa iha VI Governu Konstitusionál RDTL, PNUD mós buka atu aprende “oinsa” mak bele dezenvolve parseriedade (joint programme) ho Ministériu Justisa hodi nune’e bele haforsa liutan setór justisa iha Timor-Leste.

Ivo Valente iha ninia introdusaun katak, Governu kompremete ona atu loke an ba apoiu parseiru internasionál sira atu hetan ajudu tekníku hodi nune’e haforsa liutan setór justisa, maibe sei ajusta tuir prioridades nasionál no presiza atu diskute maiz profunda kona-ba área ne’ebé deit mak presiza atu hetan apoiu.

Área Teknolojia Informatika por ezemplu, presiza atu konsidera hodi halo transferénsia-matenek hosi ema internasionál sira ba iha Timor-oan sira, presiza apoiu nafatin Tribunal Móvel (mobile court) ne’ebé mak oras ne’e dadaun sei hetan asistensia hosi PNUD, ami sei presiza apoiu iha tinan 2 no 3 oin mai antes ami kompleta prezensa Edifisiu Ministériu Públiku no Tribunal to’o iha munisípiu ida-idak.

Iha sorumutu ne’e, ekipa PNUD husu klean situasaun servisu setór justisa nível programa iha área rurál, planu ne’ebé Governu iha dadaun no “saida deit” mak Ministériu Justisa presiza halo iha tinan 4 no 5 oin mai.

Relasaun ho apoiu ba oin, Ministru Justisa fó ninia perspetiva balun relasaun ho servisu ne’ebé la’o dadaun, planu ba oin inklui mós susesu lubun ne’ebé atinzi ona durante ne’e nu’udar esforsu maka’as diresaun ida-idak iha ámbitu Ministériu Justisa.

Sorumutu ne’e sei iha kontestu fahe pontu-de-vista ba malun no hákbiit komprimissu, tuir planu sei háklean liu tan depoiz parte ida-idak buka espasu ba posibilidade kooperasaun (joint programme) iha futuru.