INAUGURASAUN BA ESPASU EDIFISIU PROKURADORIA IHA MUNISÍPIU COVA-LIMA

Cova-Lima (Suai), loron 24 fulan-Fevereiru 2015 Ministru Justisa Ivo Valente hamutuk ho Prokuradór Jeral Repúblika (PJR) Jose Ximenes halo Inaugurasaun ba espasu Edifisiu Prokuradoria Munisípiu Cova-Lima (Suai).

Seremónia inaugurasaun ne’e, marka ho simu tais iha odomatan bo’ot, ne’ebé tama ba iha área konstrusaun edifisiu tuan. Espasu foun ba Edifisiu Prokuradoria Munisípiu Cova-Lima ho kuartu rua no Sala Reuniaun. Kustu ba konstrusaun foun ne’e ho montante osan hamutuk $76,480.0 mil dolar amerikanu, projetu konstrusaun ne’e kaer hosi kompania Elfa Unipessoal. Konstrusaun projetu ne’e remata ho durasaun fulan-hitu (7), ne’ebé sura hosi fulan-Agustu 2014 to’o Fevereiru 2015.

Iha intervensaun dahuluk, Ministru Justisa Ivo Valente fó parabéns ba Prokuradór Jeral Repúblika ne’ebé habelar dadaun ona edifisiu atu loke espasu ba Majistradu Ministériu Públiku iha Munisípiu Cova-Lima.

Ministru Justisa, Ivo Valente salienta katak, “Polítika Ministériu Justisa ba oin mak loke Edifisiu Ministériu Públiku nu’udar programa prinsipál ida no planu alargamentu mapa judisiáriu iha munisípiu hotu-hotu iha territoriu laran tomak.

Polítika ida ne’e, atu asegura ema hotu-hotu hodi asesu ba Justisa no nu’udar implementasaun artigu 26 iha ita-nia Konstituisaun RDTL.”

Hodi hakotu nia-intervensaun iha seremónia inaugurasaun Edifisiu foun Prokuradoria Repúblika iha Munisípiu Cova-Lima, Ministru Justisa espressa ninia apoiu, hau kontinua apoiu Prokuradór Repúblika, Tribunais, Defensór Públiku no advogadu sira; hodi kapasita rekursu umanu ne’ebé mak kualifikadu.

Depois intervensaun badak hosi Prokuradoria Jeral Repúblika Jose Ximenes no mós Prokuradór Munisípiu Cova-Lima Mateus Nessi; Ministru Justisa kua fita hodi inagura edifisiu, nune’e mós Prokuradór Jeral loke odomatan Edifisiu Foun nu’udar siñal katak, edifisiu ne’e bele funsiona. Prosesu inaugurasaun uma-foun ne’e hetán bensaun hosi Amu Pároku Munisípiu Cova-Lima (Suai), Padre Jose Maia.

Seremónia ne’e remata iha tuku 11:00 meudia no Ministru Justisa hamutuk ho Prokuradór Jeral kontinua halo vizita ba Prizaun Suai. Vizita ne’e hodi hare’e besik prosesu konstrusaun Prizaun Suai ne’ebé mak la’o dadaun hela.

VIZITA MINISTRU JUSTISA BA IHA PRIZAUN SUAI

Iha oras ida nia laran, hosi tuku 11:00-12:00 meudia, Ministru Justisa Ivo Valente ho Prokuradór Jeral Repúblika Jose Ximenes halo vizita ba iha fatin konstrusaun ba Prizaun Suai iha Munisípiu Cova-Lima. Vizita ne’ebé mak Ministru Justisa no Prokuradór Jeral hala’o nu’udar dalan hodi hare’e besik ba prosesu konstrusaun Prizaun Suai. Prosesu konstrusaun Prizaun Suai komesa ona atinzi 55% ne’ebé mak tuir planu sei remata iha fim de Maio 2015.

Prizaun Suai nu’udar prizaun antigu hosi tempu okupasaun Indonezia nian, prizaun ne’e lokalizadu besik Edifisiu Defensoria Públiku Munisípiu Cova-Lima. Konstrusaun prizaun ida ne’e, komesa iha tinan kotuk (2014) hosi Kompania Mar Vermenha, tuir planu projetu ne’e sei entrega ba Governu iha inisiu fulan-Juñu 2015. Hare’e hosi fasilidade no aula mak iha, prizaun Suai sei bele akumula prizioneru/ detidu sira kuaze hamutuk ema 90.

Prizaun foun iha Munisípiu Cova-Lima importante, nessesita tebes, reflete ona iha Planu Estratéjiku Setór Justisa (PESJ) nian ne’ebé kontempla ona iha desenvolvimentu diresaun nian, nune’e mós hare’e ba kapasidade hosi prizaun rua (2) ne’ebé mak eziste, iha Becora (Dili), no Gleno (Ermera) nune’e presiza tebes fatin tan no kondisaun propiu ba detidu sira.

Depoiz vizita prizaun, Ministru Justisa kontinua halo sorumutu ho funsionáriu públiku Munisípiu Cova-Lima iha ámbitu Ministériu Justisa.

MINISTRU JUSTISA HALO SORUMUTU HO NIA FUNSIONÁRIU SIRA NO MÓS DEFENSORIA PÚBLIKA MUNISÍPIU

Sorumutu Ministru Justisa Ivo Valente ho funsionáriu públiku iha ámbitu Ministériu Justisa halo iha tuku 2:34 lokoraik. Sorumutu ne’e partisipa hosi Diresaun rua, ne’ebé mai hosi Diresaun Rejistu Sívil no Diresaun Terras e Propriedade Munisípiu Cova-Lima hamutuk ema 23.

Iha sorumutu ne’e, Ivo Valente esplika objetivu hosi vizita no espetasaun Ministru nian ba iha funsionáriu sira hodi eleva sira-nia dezenpeñu iha VI Governu Konstitusionál. Iha sorumutu ne’e, Ivo Valente apela, “Hau husu ba imi-hotu atu kumpri regras nu’udar funsionáriu públiku, ita sei la halo tan rekrutamentu ba funsionáriu públiku, tanba ne’e tenke maximiza existensia funsionáriu ne’ebé iha dadaun. Hau husu mós ita-bo’ot sira tenke kumpri mós regras ezekusaun orsamentu ne’ebé aloka ona ba iha Munisípiu Cova-Lima, no hau sei buka posibilidade no meius sira hotu hodi bele faslita imi, apoiu mós transporte hanesan motorizada atu fasilita servisu bainhira imi ba iha tereñu.”

Iha sorumutu ne’e, Ministru Justisa mós loke oportunidade ba funsionáriu sira atu koalia, funsionáriu sira hato’o sira-nia preokupasaun no dezafiu sira mak sira hasoru iha Munisípiu Cova-Lima. Iha tempu mak hanesan, Ministru fó motivasaun no enkoraza sira-hotu atu servisu maka’as liu tan nune’e mós esplika posibilidade sira “oinsa” apoiu hosi Ministériu Justisa.

Enkontru remata iha tuku 04:00 lokoraik, depois Ministru Justisa kontinua halo vizita kurtisia ba iha Defensoria Públika Munisípiu Cova-Lima.

Iha vizita Ministru Justisa ba iha Defensoria Públika Munisípiu Cova-Lima hodi hare’e besik mós kondisaun servisu no fasilidade Defensoria Públika hodi hala’o sira-nia kna’ar lorloron. Iha oportunidade ne’e, Ministru Justisa espressa mós ninia apoiu ba Defensór Publika sira iha Munisípiu Cova-Lima no enkoraza sira atu servisu nafatin maske hasoru limitasaun rekursu umanu no mós fasilidade ne’ebé mak sei minimu tebes.

Iha vizita kurtisia ne’e, Ministru Justisa ne’ebé akompaña hosi Defensór Públika Jeral Dr. Sergio Hornai, sira koalia posibilidade apoiu Ministériu nian hodi fasilita servisu Defensór-sira iha tereñu. Além de hare’e besik situasaun Defensoria Munisípiu nian, objetivu seluk mak “oinsa” Ministru Justisa rona ho besik sa-dezafiu sira no obstakulu ne’ebé Defensoria Públika Munisípiu hasoru iha Munisípiu Cova-Lima bainhira hala’o sira-nia kna’ar lorloron.