Dili Justisa liu husi Diresaun Nasionál Direitus Umanus no Sidadania servisu hamutuk ho ajensia Internasionál USAID halo diskusaun meza redonda hodi determina kona-ba metodu peskiza ba programa divulgasaun lei no asesu ba justisa ne’ebe durante ne’e Ministériu Justisa divulga ba komunidade sira iha Timor laran tomak. Programa ne’e atu halao, iha USAID Program BA DISTRITU, iha Bairo dos Grilos Dili-Timor-Leste, iha loron 12 fulan Fevereiru tinan 2015.

Ministériu Justisa ho USAID realiza diskusaun ne’e hodi halo konkordansia ba metodu atu uza ba peskiza ne’ebe sei halao iha tinan ida ne’e ho métodu kualitativu no kuantitativu. Iha diskusaun ne’e mós deside ekipa ida husi Diresaun Nasionál Direitus Umanus no Sidadania mós sei sai nudar fasilitator ba peskiza ne’e iha tempu oin mai.

Program ne’e halao atu hatene komunidade sira nia kuñesimentu kona-ba programa hirak ne’ebe Ministériu Justisa liu husi Diresaun Nasionál Direitus Umanus no Sidadania halo sosializa ka divulga ona lei sira ne’ebe vigora iha Timor-Leste.

Hafoin halo diskusaun meza redonda tuir planu, ekipa Ministériu Justisa sei halo pilotu peskiza ida ba dahuluk iha Postu Administrasaun Atabae, Munisipiu Bobonaro iha loron 20 fulan Fevereiru tinan 2015.

Partisipa iha diskusaun ne’e Diretór DNDHC ho kargu xefia, Tekniku Superior no Professionál sira, atividade ne’e fasilita husi peritu peskiza husi Australia no Maria Veronica husi USAID rasik.
João Maupelo da Costa.

Ofisiál Relasaun Públika