Ministériu Justisa liu husi Diresaun Nasional Direitu Umanu no Sidadania halo enkontru meza redonda ho Instituisaun governu, Juiz Tribunal, Sosiedade Sivil, Falintil-FDTL no PNTL hodi halibur informasaun kona-ba atu halo relatoriu ba Konvensaun Anti Tortura ka Konvensaun Kontra Tortura no Tratamentu Aat iha Timor-Leste. enkontru ne’e halao iha Sentru Formasaun Jurídika Caicoli Dili, iha loron 27 fulan Janeiru tinan 2015.

Iha enkontru meza redonda ne’e Diretór Diresaun Nasionál Direitus Umanus no Sidadania, Celito Cardoso representa Ministru Justisa iha abertura hateten, iha tinan 2003 Timor-Leste halo ona komprimisu boot ida atu prevene tortura no hahalok aat sira seluk, bain hira Timor-Leste ratifika Konvensaun Direitus Umanus Internasionál, hanaran Konvensaun Hasoru Tortura no tratamentu ka kastigu kruél, Dezumanu no Degradante seluk.

Ratifika Konvensaun hodi sai hanesan kontratu ida ba Timor-Leste implementa. husi rai hotu-hotu ne’ebe ratifika Konvensaun ne’e iha obrigasaun atu halo tuir buat ne’ebe hakerek iha konvensaun nia laran.

“Timor-Leste Ratifika konvensaun lobuk ida kona-ba Direitus Umanus nian, tinan ida ne’e Timor-Leste sei halo relatoriu ida kona-ba Konvensaun Anti Tortura (KAT), relatoriu ne’e mai husi Ministériu Justisa, Provedor Direitus Humanus no Justisa (PDHJ) no ajensia Internasionál sira iha Timor-Leste. Ho enkontru ida ne’e ho objetivu atu rona informasaun no hetan dadus sira, atu ita hotu tau hamutuk no tetu oinsa atu hakerek relatoriu ida ne’ebe onestu no justu hodi haruka ba komite.”

Iha enkontru ne’e husi Sosiedade Sivil Fundasaun Mahein no Asosiasaun HAK halo apresentasaun faktu sira kona-ba kazu atuasaun ne’ebe PNTL, F-FDTL no Guarda Prizaun halo tratamentu aat ba komunidade sira iha terrenu.

Husi apresentasaun sira ne’e hetan intervensaun husi PNTL, F-FDTL, Guarda Prizaun no Juiz Tribunal hodi halo los informasaun no atuasaun hirak ne’ebe halon tiha ona iha tinan kotuk. Iha intervensaun ne’e F-DTL, PNTL no Guarda Prizaun esplika katak servisu hotu ami halao tuir ami nia regra internal ida-idak nia.

Partisipa iha enkontru ne’e, Juiz Administrador Tribunal Munisipiu Dili, Rep. F-FDTL, PNTL, Sosiedade Sivil, Rep. PDHC, Guarda Prizaun, no representante Ministériu xave sira.