Hafoin Estadu Timor-Leste restaura nia independensia iha Loron 20 fulan Maiu tinan 2002 no sai membru efetivu 191 ba Nasoes Unidas ne’ebe kesi aán iha Konvensaun Universál Direitus Umanus, hanesan Estadu Timor-Leste iha obrigasaun morál atu selebra Loron Direitus Umanus no tinan ida ne’e realiza iha munisipiu Lautem.

Ministériu Justisa liu husi Diresaun Nasional Direitus Umanus no Sidadania realiza atividade oi-oin hanesan: Treinamentu Direitus Umanus iha postu administrativu Iliomar, Konsulta Publika, Jogu amizade, loke filmajen, kompetisaun kultural (tebedai) no kompetisaun diskursu publiku kona-ba dirietus umanus ba eskola sekundaria sira iha sentru kultural Lospalos, munisipiu Lautem, hahu husi loron 5-10 Dezembru tinan 2014.

Tema ba komemorasaun tinan ida ne’e “Konsolida Dame Estabilidade hodi Asegura Observansia ba Direitus no Liberdade Fundamentais”
Iha komemorasaun ne’e Ministru Justisa iha diskursu hateten” Selebrasaun loron Internasionál Direitus Umanus sai nu’udár onra ba Asembleia Jerál Nasoens Unidas ne’ebé adopta no proklama Deklarasaun Universál Direitus Umanus (DUDU) iha loron 10 Dezembru 1948, ne’ebé hatutan Direitus baziku ba sivíl, polítiku, ekonómiku, sosiál, kulturál no liberdade.

Adoptasaun DUDU ne’e subliña igualidade no sein diskriminasaun no fornese komprehensaun kolektivu kona-ba direitu no liberdade ba membru husi Nasoens Unidas hodi promove no proteze ema umanu hotu-hotu iha mundu tomak.”

Komemorasaun ne’ ebé partisipa mós Defensor Públiku Jerál, Sergio Hornai ne’e Ministru Justisa reforsa liu tan“Tinan-tinan, hanesan rai seluk iha mundu, ita iha Timor-Leste mós selebra loron importante ida ne’e, selebrasaun loron direitus umanus iha nia sentidu ne’ebé klean, fó hanoin ba ita ida-idak laós de’it atu selebra maibe importante mak, oinsa ita bele implementa iha ita idak-idak nia moris loron-loron, selebrasaun sei laiha folin bainhira ita la implementa prinsípiu fundamentál direitus umanus hirak ne’e.”

Iha serimonia ninia rohan Ministru Justisa fahe mós premíu ba eskola sira ne’ebé sai hanesan manan nain ba kompetisaun kona-ba Direitus Umanus, dahuluk mak eskola sekundaria Públiku Nino Conis Santana Lospalos, daruak eskola sekundaria Públiku Nú. I Postu administrativu Lautem no datoluk eskola sekundaria públiku postu administrativu Lospalos.

Hafoin selebrasaun ne’ e Ministru Justisa ho komitiva konsiste husi Diretór Jerál, Inspektór, Defensor Públiku Jerál, Diretór Nasional ambitu Ministériu Justisa, Pontu Fokál Direitus Umanus liña Ministériál no autoridade munisípal Lautem halo mós vizita ba ospital referral Lautem hodi hare bebe sira ne’ ebe mak partus iha loron 10 Dezembru ne’ebe hanesan loron ba direitu umanu nian.

Hanesan divertimentu iha selebrasaun ne’ e, Ministériu Justisa halo jogu amizade entre Ministériu Justisa ho Funsiunariu Públiku munisípiu Lautem ne’ ebe manan husi Funsiunariu Munisipiu Lautem ho 1-5. Nune’ mós Ministériu Justisa inklui Ministru rasik Joga hasoru PNTL Munisípiu Lautem no jogu ne’e manan husi ekipa PNTL munisipiu Lautem ho 6-2.

Molok atu remata serimonia ne’ e Ministru ho komitiva halo mós vizita ba rate eroi ba libertasaun Timór-Leste iha Caibaca Lospalos hodi fo omenajen no tau aifunan.
Programa ne’e realiza tanba servisu hamutuk ho pontu Fokál Direitus Umanus iha Munisípiu Lautem, autoridade Munisípál Lautem no hetan suporta finansiamentu husi Unidade Asessoria Direitus Umanus (UADU) Nasaun Unidas iha Timor-Leste.