Lautem, Vise Ministru Justisa Ivo Valente, hamutuk ho Komisaria Direitu Labarik Maria Barreto, oficialmente halo abertura / loke workshop, ho topiku Mai Ita Hamutuk Promove no Realiza Direitus ba Labarik Hotu Iha Timor – Leste, salaun Dom Bosco Lautem, loron 02 – 12 – 2014.

Iha workshop nebe marka partisipasaun masimu hosi diretor geral Francisco Carceres, diretor prisaun Helder Belo, no Chefe departemento iha ambito Ministeriu Justisa nian, estudantes hosi eskola Koni Santana, inklui mos auturidade lokais no funsionarius sira hosi institusaun tomak iha distritu Lautem nian nee. Sai nudar orador ho panelista nain 4 (hat), hanesan diretor prisaun Helder Belo, diretora MSS Carme da Cruz, chefe departementu SAS Martinho Nahak, diretor saude Lautem Julio Pereira.

Intervensaun Vise Ministru Justisa Ivo Valente, hatoo agradesimento no apreciasaun ba bainaka sira, parabens ba labarik sira, no fo hanoin ba labarik sira konaba sira nian direitu oin-oin nebe sira iha hanesan direitu atu hetan edukasaun / estuda, hetan tratamento saude, justisa, sosial, oportunidade halimar no deskansa, moris iha naran no nasionalidade, moris iha komunidade nebe hakmatek no ambiente saudavel etc.

Vise Ministru Justisa Ivo Valente, koalia mos uluk iha tempo kolonialismo nebe deit HANEHAN ita labele hetan direitu ba eskola liu – liu ba ema nebe kiak mukit ( oan sira lahetan edukasaun ), maibe agrora iha direitu ba ema hotu – hotu atu hetan edukasaun.

Percisa hanoin konaba dever atu respeito inan-aman, professores no ema seluk, esforsu nebe estadu Timor-Leste halo ona, desde Timor-Leste ratifika konvensaun direitu labarik iha tinan 2003.

Governu halao politika hodi kria kondisaun atu promove no protege direitu hotu-hotu nebe labarik sira tuir konvensaun direitu labarik determina.

Liu hosi I Governu Konstitusional fo ona atensaun ba labarik sira nia moris, labarik nia direitu bazeia ba artigus nebe hakerek iha konvensaun, hahu ona nia implementasaun liu hosi Ministeriu relevantes, maibe persiza nafatin atividades, advokasia no promosaun ba labarik sira nian direitu, konsiente katak labarik maka futuro nasaun nian.

Nune, estado kúmpri dever hanesan hamosu lei sira nebe garante labarik nian direitu. Timor-Leste iha ona lei kodigu direitu labarik nian atu haríi sai Sentro Detensaun Juvenile ho karakter edukativo, atu eduka labarik sira nebe iha konflito ho lei, no seluk-seluk tan nebe necessita atu protége labarik Timor oan.

Tuir mai komisaria direitu labarik, Maria Barreto sei entrega aifuna ba labarik estudantes sira, labarik sira entrega fali ba Vise Ministru Justisa Ivo Valente, no autoridade lokais, professores, inan aman.

Iha oras tuku 17:00, diretor geral Ministeriu Justisa Francisco Carceres hodi Vise Ministru Justisa nia naran halo enceramento e fo mensagem ba labarik Lautem oan sira hatete katak imi mak futuro desenvolvimento distritu Lautem nee, ho liafuan seluk lingua portugues “ O MAIOR PATRIMÓNIA DE UMA NAÇÃO É O SEU POVO. O MAIOR PATRIMÓNIA DE UM POVO SÃO AS SUAS CRIANÇAS”. Hafoin halo rifa, sei fo premiu ba manan nain sira.

Iha dia 3-12-2014, Vise Ministru Justisa Ivo Valente hamutuk ho Komisaria Direitu Labarik Maria Barreto akompanha diretor geral Francisco Caceres, diretor prisaun Helder Belo, auturidade lokais ho funsionarius Ministeriu Justisa nian halao vizita kurtizia ba KRESE iha suku Leuro (programa vizita nee hosi CHILD FUND), hodi hare besik labarik sira nian situasaun krese iha fatin refere, fila hosi Leuro sei halo vizita ba CHILD FUND hodi hare lalaok servisu child fund nian iha distritu Lautem nee.

Ikus liu komitiva Ministeriu Justisa sei almosu hamutuk iha Restaurante moris foun, hafoin fila hikas mai Dili iha tuku 14:00 loraik.