Prosesu konsulta públika kona-ba dezenvolvimentu lei Justisa tradisionál, ne’ebé organiza hosi Diresaun Nasionál Asesoria Jurídika no Lejizlasaun - DNAJL - Ministériu Justisa nian – MJ - ne’ebé hetan apoiu hosi Programa Nasoins Unidas ba Dezenvolvimentu - PNUD - hahú hala’o iha loron 2 Dezembru, iha Baucau.

Objetivu ba prosesu konsulta públika ida-ne’e, hanesan ho ida-ne’ebé Ministériu Justisa sei hala’o, maka halo aprezentasaun no diskusaun kona-ba liña prinsipál dezenvolvimentu hosi lei kona-ba justisa tradisionál no kestaun sira ne’ebé lei ida-ne’e sei regula.

Diploma kona-ba justisa tradisionál sei regula efeitu jurídiku sira hosi akordu hirak-ne’ebé hamosu hosi uza mekanizmu tradisionál hodi rezolve konflitu, ne’ebé hatuur ligasaun entre justisa informál ka tradisionál ho justisa formál. Hanoin katak lei ida-ne’e sei aplika ba krime determinadu sira nomatéria balu direitu sivíl nian, hodi hametin nafatin direitu fundamentál hirak-ne’ebé presiza uza mekanizmu sira-ne’e.

Ba diskusaun, konvida ona entidade públika oioin, maka hanesan Tribunál Distritál, Prokuradoria Repúblika Distritál, advogadu privadu sira, Polísia Nasionál Timor-Leste - PNTL, lideransa komunitária sira nomós organizasaun sira sosiedade sivíl nian.

Ekipa ida lidera hosi Señór Diretór Nasionál DNAJL, Dr.Nelinho Vital, aprezenta tiha proposta oioin kona-ba dezenvolvimentu lei ida-ne’e nian.

Depois aprezentasaun sei tuir kedas ho diskusaun entre partisipante sira kona-ba matéria hirak-ne’ebé lei sei regula nomós forma ligasaun entre justisa tradisionál ho justisa formál.

Tanba matéria ida-ne’e importante tebes ba setór justisa, DNAJL sei organiza, ho apoiu hosi PNUD, enkontru iha nivel distritu no nasionál ho objetivu hanesan. Rezultadu sira hosi diskusaun hirak-ne’e, iha oinmai, sei sai nu’udar konsiderasaun ba redasaun ikus diploma ida-ne’e nian.
Portugues
Lei Kona ba Justisa Tradisional PDF
Texto apresentacao Suai