Maubara, Hafoin halo tiha workshop iha Dili fulan kotuk konaba lei justisa juvenile nian, hamosu rekomendasaun ida konaba atu halo fila fali revizaun tekniku ba proposta lei LETM nian, Revizaun tekniku ne’e sei lidera husi DNAJL.

Hare ba importansia husi proposta lei LETM, tuir Despacho Vice Ministro Justisa, atu DNAJL servisu hamutuk ho Komisaun Direitu Labarik nian (KNDL) no UNICEF hodi halo revizaun ba proposta ne’e, antes atu hatama ba Konselhu Ministru.

Ho ida ne’e, iha loron 24-25 Novembru 2014, ekipa DNAJL nian ne’ebe lidera husi Direitor, Sr. Nelinho Vital, hamutuk ho Sr. Evangelino Belo (Xefe Dep. Politika Legislativa), Sr. Pascoal Da Costa (Xefe Dep. Dokumentasaun Juridiku), Sra. Hildegardis (jurista) no Sr. Jose Edmundo (jurista) hala’o diskusaun tekniku hodi reve fila fali proposta lei LETM ne’e, iha Maubara, Municipio Liquiça. Revizaun ne’e, hala’o hamutuk ho juis husi Tribunal Recurso, Defensor Publiku Jeral, Direitor Diresaun Nasional Servisu Prizaun no Reinsersaun Sosial (DNSPRS)-MJ, Diretora Protesaun Labarik Ministeriu Soliedariedade no Sosial (MSS), Komisaria Komisaun Nasional Direitu Labarik (KNDL), representante sosiadade sivil, inklui UNICEF rasik.

Durante loron 2 (rua) diskusaun, konsege hamosu duni alterasaun balun ba proposta lei LETM nian, hanesan altera medidas balun husi kautelar edukativu nomos hamosu rekomendasaun atu prepara planu asaun ba implementasaun lei LETM ne’e.

Planu asaun ne’e rasik sei mai husi instituisaun relevante hanesan; MSS, MJ, ME, MS nomos sosiadade civil, Planu asaun ne’e, atu sai hanesan matadalan ida ba implementa lei refere.

Tamba hare ba importansia husi proposta lei ne’e, iha mos hanoin ida katak, diskusaun ne’e sei hala’o iha tempu balun tan, atu hodi diskuti klean liu tan, entre parte sira, molok submete ba Konselhu Ministro.

(Mize Correia/DNAJL)