Ministru Justisa, Dionisio Babo Soares, hahú ona sorumutuk lubun ida ho ministru no responsável sira Governu Portugál nian, iha Lisboa. Horseik Ministru lala’o sorumutu ho ninia omóloga portugeza, Paula Teixeira da Cruz. Ohin, tersa-feira, loron 18, sei hala’o sorumutuk ho Prokuradora-Jerál Repúblika nian hamutuk ho responsável sira hosi Konsellu Superiór Majistratura. Sorumutuk hirak ne’e sei diskute liu kona-ba Rezolusaun Parlamentu Nasionál Timor-Leste nian foin daudauk ne’e, ne’ebé apela ba Governu atu hahú auditoria téknika ida kle’an ba sistema judisiál no hakotu kontratu sira ho funsionáriu internasionál sira ne’ebé hala’o servisu iha setór ida ne’e. Rezolusaun Konsellu Ministrus nian tuirmai kona-ba funsionáriu espesífiku sira ne’ebé tenke husik ona Timor-Leste mós sei diskute.
Rezolusaun rua ne’e, tuir hotu-hotu hatene, hamosu preokupasaun boot iha Portugál, tanba ema sira ne’ebé afetadu ba rezolusaun rua ne’e barak liu ema portugés.

Tuir entrevista naruk ida ne’ebé fó ba LUSA, iha loron 5 fulan Novembru, Primeiru-Ministru, Kay Rala Xanana Gusmão, apela atu komprende, hodi haree didi’ak katak “ laiha hanoin ida atu hadook relasaun sira ho Portugál” no hatudu ona katak problema sira estraordináriu no naruk nafatin baiha área judisiál ezije asaun estraordinária ida no urjente.

Maske hateten, ho laran todan tebe-tebes, kona-ba oinsá mak buat hirak ne’e mosu, Primeiru-Ministru Portugál nian, Pedro Passos Coelho, konfirma ona amizade Portugál no Timor-Leste nian no kualidade relasaun, ho Primeiru-Ministru nomós ho Prezidente Repúblika Timor-Leste nian.

Portavós Governu Timor-Leste nian Ágio Pereira hatete katak,”Timor-Leste hahí tebes biban ba diálogu ida ne’ebé mak hala’o entre Ministru Justisa no ministru no responsável sira Governu Portugál nian, atubele klarifika kona-ba akontesimentu ne’ebé mosu foin lalais ne’e.” Portavós Governu nian fó hanoin mós ba”relasaun istórika nian ne’ebé kle’an tebes, no mós solidariedade entre nasaun rua ne’e no iha hakarak ida de’it, hodi eziste sistema justisa nian ida ne’ebé forte, justu no efisiente ne’ebé implementa ona iha
Timor-Leste”.FIN
Download PDF Portugues
Download PDF Tetum