MANATUTO-Sekretáriu estadu Terras Propreidades (SETP) Jaime Xavier Lopes iha loron 10 fulan-Novembru 2014 foin lalais ne’e hala’o lansamentu ba iha levantamentu dadus kadastrais tuir Sistema Nasionál Cadstro (SNC) iha Edifisiu Terras Propreidades Servisu kadastrais Munisipiu Manatuto.

Iha lansamentu ne’ebé simbolikamente entrega tablet hosi SETP ba iha ekipa tékniku SNC nian sira ne’e nia husu ba komunidade liu-liu ba iha komunidade sira ne’ebé maka tama iha area levantamentu nian tenki kria koperasaun ne’bé di’ak inklui mós tenki fó sira nia suporta ba iha ekipa tékniku sira nune’e bele fasilita sira atu halo levantamentu.

Tuir Jaime, bainhira servisu ekipa tékniku nian sira atu susesu tenki hetan kontribuisaun neebe boot hosi komunidade sira. Bainhira komunidade sira maka la fó sira nia suporta entaun ekipa tekniku sira mos sei labele halo buat ida.

Jaime mós husu ba komunmidade sira atu bele prepara dokumentus legál ruma kona-ba rai nian, hanesan sertifikadu anterior, inklui mós dokumentu sira hanesan kartaun eleitorál ka pasaporte e sertidaun batizmu nian, husu ba komunidade sira hodi bele fó informasaun ne’ebé maka loos ba iha ekipa sira.

Iha biban ne’e nia ko’alia mós kona-ba artigu sira iha konstituisaun RDTL nian ne’ebé maka iha relasaun ho rai maka hanesan artigu 54 hakerek kona-ba direitu ba propriedade privada, artigu 141 hakerek kona-ba rai, no artigu 161 hakerek kona-ba hasai rikusoin la tuir lei.

Hatan ba prekupasaun komunidade sira nian kona-ba rai kultura, tuir Jaime bainhira komunidade sira hateten rai kultura tenki iha kultura ruma ne’ebé maka ejisti iha rai nia leten, maibé bainhira temi rai kultura la iha kultura ruma maka iha rai nia leten estadu konsideira rai ne’e estadu nian.

Hanesan membru governu ne’ebé tomakonta asuntu rai nian Jaime husu ba komunidade sira ne’ebé maka okupa rai luan labele halakon rai nia funsaun sosiál, selae estadu sei foti hotu tuir lei haruka.

Iha fatin hanesan Administradór Jerál hosi Kompaña SNC, Jorge Serano hateten, levantamentu dadus tuir sistematiku ne’e sei sukat parsela hotu iha Timór laran, tanba kompaña sei hala’o ninia knaar tuir fiar ne’ebé fó hosi governu, levantamentu ne’e sei la’o nafatin.

Jorge hateten durante ne’e halo sosializasaun laiha problema, tanba ne’e husu ba komunidade sira hodi bele fó informasaun ne’ebé loos ba iha ekipa tékniku sira.

Nia mos hateten projetu ne’e hanesan projetu ne’ebé maka gratiuitu, tanba ne’e bainhira ekipa sira husu osan ba iha komunidade sira, tenki hato’o keisa ba superior sira hodi bele toma atensaun ba sira ne’ebé maka husu osan.

Hanesan uma-na’in Administgradór Distritu Manatuto, Gaspar Hunu Gusmão husu ba komunidade no autoridade lokál sira iha Manatutu nian hodi bele fó sira nia apoiu ba iha ekipa sira, nune’e nia mós husu ba komunidade sira hodi bele fó informasaun ne’ebé loos ba iha ekipa tekniku sira.*
Ananias Babo Horta
Media Officer SETP