Pontu fokál Pré-Deskonsentraaun Administrativa (PDA) Ministériu Justisa partisipa iha konferénsia Internasionál kona-ba Desentralizasaun Administrativa no Púder lokal iha Otel Timór iha loron 30-31 fulan Outubru tinan 2014.

Vise Primeiru Ministru iha abertura hateten,” ita presiza apriende liu tan husi ema seluk, ho nune’e ita konvida ema seluk mai ita nia rai hodi koalia, atu nune’e ita bele implementa buat foun hodi halo prosesu desenvovimentu iha ita nia rai.”

Iha fatin hanesan Sekretaria Estadu Desentralizasaun Administrativa, Tomas Cabral iha diskursu hateten,” desentralizasaun atu lao diak Sekretaria Estadu Desentralizasaun Administrativa (SEDA), Sekretaria Estadu Fortalesimentu Institusionál (SEFI) no Sekretaria Estadu Apoiu ba Setór Privadu (SEAPRI) hamutuk sekretariu estadu tolu ne’e tenke fo apoiu maka’as. Nune’e mós hau (Tomas Cabral) rekuñese Pontu Fokál Pré-Deskonsentrasaun Administrativa Ministériu Justisa halo ona enkontru ho funsiunariu iha Munisipiu sira.”

Sekretaria Estadu hirak ne’e hato’o sira nia matéria kona-ba politika desentralizasaun no puder lokal iha mós oradór internasionál sira ne’ebe mai husi Victoria Australia, Portugal no Indonesia. Oradór internasionál husi Portugal koalia kona-ba Poder Lokál iha Portugal ho ninia dezafiu no solusaun sira, oradór internasionál husi Victoria-Australia koalia kona-ba Puder lokál no Estadu Victoria ho dezafiu no solusaun nune’e mós husi Indonesia koalia kona-ba Puder Lokál dezafiu no solusaun, maibe iha konferensia ne’e oradór husi Indonesia la konsege mai.

Hafoin oradór sira hato’o sira matéria kona-ba Desentralizasaun no Puder Lokál fo tempu ba partisipante konferensia hodi husu.

Iha biban ne’e Pontu Fokál PDA Ministériu Justisa, Antonio Verdial husu ba oradór internasionál sira dehan,” Ministériu Justisa iha diresaun rua mak ejiste iha munisipiu sira iha Timor laran, hanesan Diresaun Terras no Propriedade Servisu Kadastrais (DTPSC) no Diresaun Rejistu Notariadu (DRN). Ho nune’e ami husu ba oradór husi Australia no Portugal atu fo apoiu kapasitasaun ba rekursu umanu iha parte seitór justisa.”

Nune’e mós Pontu Fokál PDA Ministériu Justisa, João Maupelo da Costa iha perguntas kona-ba oinsa esperensia implementasaun politika Desentralizasaun Administrativa iha Victoria-Australia no Portugal, implemeta ba teritoria dala ida ka implementa etapa ba etapa no oin sa ninia problema no solusaun.