Direitu no Dever nu’udar sidadaun iha estadu Demokratika sai topíku ba palestra Vise Ministru Justisa ba estudante ensinu sekundaria iha Sentru Formasaun Juridika Caicoli Dili iha loron 24 fulan Outubru 2014.

Palestra ne’e hodi haklean koñesimentu ba estudante sira no fahe informasaun hodi promove no hametin ema barak nia konsiensia hodi kontribui no hametin sistema lei no justisa hodi implementa politika direitus umanus iha Timor-Leste.

Diretór Diresaun Nasionál Direitu Umanus no Sidadania, Celito Cardoso iha abertura hateten,” ohin konvida ita boot sira mai iha fatin ne’e ho objetivu atu fahe informasaun atu ita boot sira bele hatene kona-ba saida mak direitu no saida mak dever iha ita boot sira nia moris lor-loron no labele uza sala ita boot sira nia direitu.”

Iha fatin hanesan Xefe Departamentu Direitus Umanus, Francisco Vasco Soares ne’ebe reprezenta Vise Ministru Justisa iha Palestra ne’e hateten,” Dever sidadaun nu’udar konseitu ida ne’ebe hatur iha obrigasaun sidadaun nian hodi kumpri no halao tuir obrigasaun estadu nian ne’ebe sidadaun sira ba ita nia estadu liu husi aspetu politika legal, sosial, ekonomia no sira seluk tan. Tanba ne’e direitu no dever hanesan komponente ne’ebe kesi metin iha ema umanu ida-idak ne’ebe moris iha sosiedade ka nasaun ida. Maske nune’e direitu no dever sidadaun sira hotu sei regula tuir lei no lei mak sei limita direitu hirak ne’e.”

Iha programa ne’e Komisaria Komisasaun Nasionál Direitu Labarik (KNDL), Maria G. Barreto ne’ebe lori materia kona-ba impaktu Prostituisaun no Pornografia, iha esplikasaun hateten direitu sira hotu iha ita boot sira nia liman maibe labele koko lai imi nia direitu.”

Hafoin palestra ne’e hotu tiha Diretór Celito Cardoso no Komisaria KNDL entrega simbolikamente livru Konstituisaun RDTL ba kada eskola hetan kuantidade atus ida (100).
Partisipa iha programa palestra ne’e mai husi eskola ensinu sekundariu sira iha Dili laran, tuir konvite hamutuk eskola 24 maibe sira ne’ebe partisipa iha dei’it eskola ensinu sekundaria públiku lima (5) no privadu hat (4).

Programa ne’e realiza tanba servisu hamutuk entre Ministériu Justisa liu husi Diresaun Nasionál Diretus Umanus no Sidadania ho Ministériu Edukasaun Munisipiu Dili no suporta husi United Nation Development Program (UNDP).