Sorumutu refere hala’o iha antigu edifísiu administrasaun Distritu Bobonaro iha loron Sesta-Feira liu ba, data 17 fulan Outubro Tinan 2014. Marka prezensa maka Directór DRN, DTPSC hó funsionárius hotu.

Iha biban ne’e Pontu Fokál Pré-Deskonsentrasaun Ministério Justisa hateten katak : Governu Konstitusional da V liu husi Konselhu Ministru aprova tiha ona Rezolusaun Governu nebe preve kona-bà desizaun hodi hahú prosesu Desentralizasaun Administrativa iha Distritu /Munucipiu tolu : Aileu, Ermera no Liquiça núdar Munisípiu pilotu, Governu Sentral determina unidade territorial tolu ne’e hodi hahú prosesu reforma administrativa ho razaun tan distánsia nebe la dok husi capital Dili, hó nune sei fasil liu ba Governu Sentral hodi fó akompañamentu no atensaun ne’ebe díak, liu iha etapa dahuluk ida ne’e.

Prezensa Koordenador Pontu Fokál PDA, António Verdial de Sousa iha Munisípio Bobonaro hodi dadalia kona-bà preparasaun DRN no DTPSC no hare mós dezafius saeda deit maka sira hasoru. Iha biban refere hó seriedade rona halerik ne’ebé sai núudar obstákulu ba funsionáriu Munisípiu Bobonaro mak hanesan trasnporte, estrutura, rekursu humanus, orsamentu, ekipamentus.

Iha sorumutu refere Diretór DRN kestiona kona-bà estrutura DRN Munisípiu Bobonaro ne’ebe to’o ohin loron seidauk iha “klareza” no responsabel DRN husu atu DNRN tau matan iha tempu badak.

Nune’e mós responsavel DTPSC hato’o mós preokupasaun bo’ot kona-bà lalaok Projecto Sistema Cadastro Nacional (SCN) ne’ebe to’o ohin loron seidauk halo asaun konkretu.

Liga mós ba emar ne’ebe hala’o knar iha projetu refere to’o ohin loron seidauk hala’o sira nian knar no sélós mak bele responsabiliza. Tamba to’o ohin loron seidauk iha orientasaun husi nível nasional.

Iha mós maluk ne’ebe hala’o knar iha projetu refere kestiona no dehan uluk sira hala’o knar iha Projeto Ita Nia Rai, depois sira transfere mai DNTPSC hanesan funsionáriu kazual hodi fó apoiui ha DNTPSC.

Ikus mai mosu projetu SCN ne’ebe funsionáriu kazual hirak ne’e balun transfere fali ba projetu refere no balun nafatin hela hanesan funsionáriu kazual iha DNTPSC.Tamba saeda mak iha deskriminasaun hanesan ne’e ? Karik projetu refere remata no sira kestiona “Oinsá sira nian futuru” ? No sira mós hateten katak sira simu saláriu maibe serbisu laiha. Sé lós mak sala ? Kestoens hirak ne’e ezizi responsabilidade husi lideransa liu-liu DNTPSC no DNRN.

Iha biban hanesan Pontu Fokál Pre-deskonsentrasaun administrative Ministério Justiça enkoraja responsáveis DRN no DTPSC nafatin efetiva sira án iha reuniaun kinzenal ne’ebe realize iha Munisípiu ida ne’e no ikus liu entrega hela estrutura Pré-Deskonsentrasaun Administrativa ba responsavel DRN no DTPSC no halon atu tara iha edifísiu ida-idak.

Tuir observasaun Koordenador Pontu Fokál Pré-Deskonsentrasaun Administrativa Ministério Justisa nota katak funsionário sira iha espírito atu serbi presiza deit maka orientasaun tengki klareza atu nune’e sira bele hala’o knar díak liu tan.