Pontu Fokál Pré-Deskonsentrasaun Administrativa Ministériu Justisa entrega Estrutura Munisipiu ba Diretór Diresaun Terras Propiriedade Servisu Cadatrais (DTPSC) Munisipiu Liquisa iha loron 10 fulan Outubru 2014.

Iha soru mutu ne’e maske Diretór DTPSC Munisipiu Liquisa , Tito Serrão da Silva, laiha fatin maibe delega hela ba ninia adjutu hodi atende ekipa Pontu Fokál Ministériu Justisa hodi halo enkontru ho funsiunariu sira iha edifisiu DTPSC Munisipiu Liquisa.

Koordenadór Pontu Fokál PDA, Antonio Verdial de Sousa iha enkontru ne’ e hateten,” komesa loron 27 fulan Setembru 2014, distritu Aileu, Ermera no Liquisa nia naran laos ona distritu maibe muda ona ba administrasaun munisipiu.”

Hafoin Verdial esplika tiha kona-ba estrutura Munisipal ba funsiunariu sira, no fo tempu ba sira hodi hato’o sira nia preokupasaun ka dezafiu mak durante ne’e sira infrenta iha servisu fatin hanesan; Rekursu umanus menus, ekipamentu la sufisiente.

Iha fatin diferente ekipa PDA hasoru malu ho Diretor DTPSC hodi buka hatene kona-ba situasaun kondisaun servisu DTPSC nian iha munisipiu Liquisa, Tito Serrão da Silva hateten,” iha ami nia servisu fatin agora dadaun ami iha difikuldade kona-ba funsiunariu, tanba durante ne’e ami servisu ho de’it funsiunariu nain nen (6), maibe agora dadaun nain ida hanesan xefe seksaun administrasaun Sra. Lizina da Costa Hornai aplika vaga ba sekretaria administrador Postu Liquisa no nia liu, entaun agora nia muda tiha ona. Agora ami nia funsiunariu hela de’it ema nain lima (5).”

Relasaun ho rekursu umanus Diretor DTPSC reforsa liu tan dehan,” ami nia funsiunariu limitadu, hafoin ida ne’e ami nia funsiunariu balun ne’ebe uluk transfere husi ARD (ita nia rain) mai DTPSC ne’e to’o agora seidauk sai funsiunariu permanente no sira sai funsiunariu kazual de’it. Entaun oinsa ho sira nia vida, se ita la tau matan ba sira ho diak loron ruma sira hetan fatin seluk sira bele muda tiha husi DTPSC, entaun ita lakon.”

Tuir observasaun ekipa PDA hatudu katak kona-ba edifisiu ba diresaun ne’e agora dadaun sufisiente atu implemeta programa munisipiu maske transporte ba funsiunariu sira iha DTPSC munisipiu Liquisa iha de’it kareta ida no motorizada ida mak ho kondisaun la diak ona, maibe ida ne’e mak sira nia kondisaun servisu.

Ekipa Pontu Fokál PDA Ministériu Justia:
1. Antonio Verdial de Sousa
2. Maurino Corte Real Tilman
3. João Maupelo da Costa

João Maupelo da Costa
Pontu Fokál PDA Ministériu Justisa