Lisboa,- Hanesan programa ikus husi servisu Komisaun Trabalhu ba asuntu kombate trafiku humanu iha Lisboa,10-12 Setembru 2014, Secretarido Permanente ba Conferencia Ministros Justiça CPLP (CMJCPLP), organiza worksop internasional ida ho tema konaba Dezafiu no Oportunidade ba Luta Kontra Trafiku Humanu iha CPLP. Workshop ne’e hala’o iha loron Sexta, 12 Setembru 2014 ne’ebe hola fatin iha Auditorium Edifisiu H, Campus Justiça, Lisboa. Orador ba workshop ne’e mai husi Procurador husi Prokuradoria Geral Portugal, Diretor Gabinete INTERPOL Portugal nian, Diretor Geral Servisu Estrangerio e Fronteira-SEF, Portugal nomos reprezentante husi Policia Judiciaria-PJ, Portugal. Aleinde ne’e, iha mos orador seluk mai husi rep.Ministeriu Justisa Brazil, rep. Ministeriu Justisa Mozambique, Diretor Servisu Migrasaun Portugal no Nelinho Vital, hanesan reprezentante husi Ministeriu Justisa Timor Leste.
Marka mos presenza iha workshop ne’e, Diretora Jeral Politika Justisa-DJPJ, Ministeriu Justisa Portugal ne’ebe hanesan mos Secretaria Geral ba CMJCPLP, diplomata husi nasaun CPLP, akademiku sira, nomos konvidadu sira seluk.

Iha nia intervensaun, Nelinho hatete katak, “maske Timor Leste hanesan nasaun foun (se kompara ho membru CPLP sira seluk), Timor Leste hatudu nia komitmentu bot tebes ba luta kontra trafiku humanu. Komitmentu ne’e hanesan Konstituisaun Republika hatúr momos konaba ema hotu nia direitu atu moris hanesan, la sai atan ba ema seluk, liberdade nomos igualdade entre feto no mane.” Timor Leste mos ratifika ona konvensaun internasional ba direitu humanus nian ne’e lubuk ida, hanesan direitu labarik nian ho nia protokolu opsional konaba pornografia infantil, Protocolo Palermo, Protocolo kontra krime organizado transnasional relasiona ho trafiku humanu, liu-liu ba feto nomos trafiku humanu liu husi tasi, rai maran nomos kalohan. Atu konkretiza liu tan prinsipiu hirak ne’e, Kodigu Penal iha artigu 163-166 mos kriminaliza hahalok trafiku humanu, tuir sa ida maka hakerek iha Protocolo Palermo, hatutan Nelinho.
Objetivu husi workshop ne’e, atu analiza no diskuti konaba situsaun atual trafiku humano iha nasaun CPLP sira nian. Maske kazu trafiku humanu iha Timor Leste la dun ás, ne’e la signifika katak Timor Leste livre husi trafiku humanu. Tamba iha futuru mai, Timor Leste mos bele sai hanesan nasaun orijin, transitu ou nasaun destinu ba trafiku humanu ne’e. Tamba ida ne’e, kooperasaun diak entre nasaun sira, importante tebes ba luta kontra rede trafiku humanu ne’e, inklui kooperasaun husi nasaun membru CPLP nian.
Workshop ida ne’e, taka iha lokraik hafoin halo debate.Mize-DNAJL.